Kalay Peng Ralhrang Sakhan Leng An Kah Nak Le Khampat Khua Ralhrang Sakhan 2 Mipi Ralkap Nih An Lak Nak Kong. Kalay Peng Ralhrang Sakhan 6 Leng An Kah, Khampat Khua Ralhrang Sakhan 2 Mipi Ralkap Nih Nihin Zing Ah An Laak
Sagaing ramṭhen, Kalaymyo peng, Zayagyo palik sakhan, Zayagyo-se a hngaktu SAC ralhrang sakhan, Myauksee palik sakhan, Thintaw khua pyusawhti sakhan hna telh in SAC ralhrang sakhan 6nak tlawm lo cu nihin zing ah mipi ralkap hna nih voikhat kah ah an kah hna, tiah kan theih.
November 3 deilei sang ah SAC ralhrang sakhan, palik sakhan le pyusawhti sakhan hna (Azapi fonh 6) cu luhhnawh in an kahdoh hna hi asi i, a tlawm bik 2 cu mipi ralkap ṭangṭi phu hna nih an laak khawh cang. A dang sakhan pawl zong an laak khawh cangmi an umko nain thawng fiang kan hlat liopi a si, tiah kahdohnak thawnglatu nih a chim.
“Myauksee khua palik sakhan le Thintaw khua pyusawhti sakhan cu an laak khawh cang hna. Cu pinah Zayagyo palik sakhan zong an laak khawh cang tiin thawng kan theih ca ah kan hlat cuahmah liopi a si. A zapi in voi kah ah an kah hna caah mipi ralkap hna nih thawngthanhnak an tuah rih lo” tiah a chim.
Mah bantuk ṭhiam in Tamu peng, Khampat khuapi um palik sakhan le Wei-tote khua SAC ralhrang sakhan cu mipi ralkap ṭangṭi phu hna nih nihin zing deilei suimilam 4:30 tluk ah an kahdoh hna i an laak khawh hna, tiah kan theih.
CDF-Tongzang hruaitu pakhat nih “Khampat palik sakhan, Wei-tote SAC ralhrang sakhan le Zayagyo-se ralhrang sakhan (An zapi 3) cu voikhat kah ah kah ṭi an si. A thimi zong an um tiin kan theih.
Zayagyo zong sakhan nganmi a si lo caah an laak khawh ko lai” tiah a chim. Atu bantuk in kahdohnak a chuah ruang ah Khampat khuapi tualchung mi hna cu leikuang le ramtang ah an zaam hna, tiah theih a si. Lungmili Post