Ukraine nichuah lei kap ah a ummi Bakhmut khua chung i, thla 5 chung kahdohnak ah hin minung thong 20000 leng an thi cang I a hliam mi hna zong minung thong 80,000 hrawng an si kong White House in chimnak nawl a ngeitu John Kirby nih nikhatni ah khan a chim theih a si .
‘Russia nih Bakhmut in donbass khua lak an I tim nain an tlamtling kho lo, Russia dirhmun in a biapi mi hmunram hna cu pakhat hmanh a lak kho rih hna lo tiah a chim zong theih a si .
Mipi sinah American nih a langhtermi thawng hna hnatchih in a thimi hna hi Russia mithat phu Wagner nih thongtla mi hna a khawmh suat mi ralkap pawl an tam khun hna tiah theih asi.
A thimi an tam nak hi Bakhmut khuachung ah a si pinah December thla chung in a khawmh suat mi document pawl zong an si kong theih a si, bakhmut kahdohnak ah hin cun Russia ralkap lei in a thimi an tam deuh, an hriamnam chiahnak le hriamtlai phu pawl zong fah an tuar khun hna tiah Kiby nih cun a chim.
A thimi zat an ruah damh mi hna kong he pehtlai in American nih cun zeihmanh chim phuahnak a ngei lo nain mah kahdohnak ah phung a buar tu cu Russia kong cu fiang tein hngalh a si.
Thawngthanhnak an tuahmi ah cun American ram kip fonh hna nih hriamnam bawmhnak le training peknak tel pawl an tuahpi hna , ramkip fonh phu an himnak ding caah tiin langhter awk a tha lomi thil cu an langhter hna lokong chimnak nawl a ngeitu pakhat nih a chim.
