NATO Member Vialte Nih Ukraine Cu Chungtel Si Ve Ding In An Cohlan Cang. North Atlantic Treaty Organisation(NATO) secretary general Jens Stoltenburg nih cun, NATO chungtel vialte nih kahdohnak a daih tikah Ukraine cu chungtel si ve ding in an cohlan cang, tiah a chim.
Ukraine bawmhnak kongkau zong a ra lai mi tonbiaruahnak, Ramstein airbase Germany i ngeih ding mi ah kan ceih rih lai, tiah a chim chap. “NATO ram vialte nih chungtel si te ding in an cohlan cang.
President Zelenskyy zong chungtel si ding in tlamtlinh a herh mi kong le chungtel si hnu zulhphung kongkau ah biaruahnak kan ngeihpi i, theihthiamnak kaupi a ngei. Ahohmanh nih zeitik ah dah kahdohnak(Ukraine-Russia) a dongh lai kan hngal lo, atu i kan chim khawh mi cu kahdohnak a chuah ṭhan nakhnga lo kan i zuam lai,” tiah Stoltenburg nih cun a chim.
NATO chungtel hna hi ram pakhatkhat nih a kah sual hna ahcun chungtel dihlak in kan i bawm lai tiah biatiamnak an ngei i, cucu Ukraine nih a duh ruang ah NATO chungtel si a rak hal pengnak a si.
2008 kum i phunghram an rak ser ning ah Ukraine cu NATO fonh kho ding a si nain phungning tein halnak an rak tuah bal lo i, nikum September thla ceo lawngah phungning tein chungtel si halnak an rak tuah.
Ukraine le Russia karlak ah ralpi a thawh lio ruangah lakhruak in Ukraine cu NATO chungtel ah khumh awk a ṭha lo i, Russia nih Nuclear ral a thawhter sual lai ti phan ah atu bantuk in kahdohnak a dih hnu lawng ah chungtel si ding in an cohlan kong The Guardian nih a ṭial.
