Tuni Kawlram Thawngpang Vialte Lak Ah Theih Nuam Lo Cem Mi Thawngpang
SAC Chairman Min Aung Hlaing Nih Milu Cazin Laak A Timh. Hramhram nawlngeihnak a latu SAC nih tuah a timhmi thimnak ah vote cazin a dikmi a sinak ding caah rampi huap in milu cazin a laak ṭhan lai tiah theih a si.
February ni 23, Naypyidaw ah tuahmi SAC chungtel tonbiaruahnak ah milu cazin kan laaknak kumhra a rauh cang caah ram pumpi huap in a dikmi milu cazin kan laak ṭhan a herh tiah SAC chairman Min Aung Hlaing nih SAC council chungtel thar hna he a voi khatnak tuahmi tonbiaruahnak ah a chim.
Kanmah nih cun mizapi harsatnak hi kan theihthiampiak ko hna. SAC ralkap nih meithal i chuah in cazin khomhnak an tuah a si ahcun pek ding an si ko, mipi harnak kan theihthiam ko tiah NUG vuanci-choh zung in chimphuannak nawl a ngeitu U Nay Bone Lat nih a chim.
Vote thlak tikah cazin a dikmi a si a herh tiin milu cazin laaknak kong he pehtlai in SAC chairman Min Aung Hlaing nih a chimmi a si caah, SAC nih kan tuah lai tiah timhtuahnak an ngeihmi thimnak cu 2023 chung ah tuah khawh dawh a si lo tiin chimceihtu zong an um.
SAC nih tuah an timhmi thimnak kong he pehtlai in NUG nih a lungtlin lonak a chim bantukin NUG ramdang lei vuanci Daw Zin Ma Aung zong nih SAC nih thimnak a tuah timhmi cu phungning lo a si tiah a chim.TCP
