Pakhatnak: Ayardaw Peng Kahdohnak Ah SAC Ralkap 10 An Thi. Sagaing ramṭhen, Ayardaw peng ah rallam a sialtu SAC ralkap le PDF kar February ni 23 zing suimilam 10:00AM ah kaphnih kar kahdohnak a chuak. Cu kahdohnak ah cun SAC ralkap 10 an thi tiah theih a si.
Myin Yuakyi Myauk (မင်းရွာကြီးမြောက်) khuachung ah minung thazaang 150 hrawng nih umhmun an khuarnak sakhan cu kahdoh ding in timhtuah a si lio meters 50 tluk a hlatnak hmunhma phanh lioah, minung thazaang 30 hrawng he rallam sialtu SAC ralkap le tualchung hriamtlai phu cu an i ton caah kaphnih kar minutes 20 leng hrawng kahdohnak a chuak tiah PDF Taungta in ṭuanvo ngeitu Ko Zin Yaw nih a chim.
Kaphnih kar kahdohnak ah SAC ralkap 10 an thi. Kahdohnak a chuah hnu ah SAC ralkap lei Mi-35 Helicopter 4 in minung thazaang 100 leng a chap tiah a chim.
SAC ralkap hna cu Taungta PDF le Sagaing pengkomh battalion 7 phufonh nih an kahdoh hna. PDF lei hliamhna tuarnak um loin hnu an tolh kho tiah theih a si.
Pahnihnak: Sagaing Ramṭhen Chung Myanmar Economic Bank Hngak SAC Ralkap Kah An Tong, 3 An Thi
Sagaing ramṭhen, Butalin khuachung um Myanmar Economic Bank a hngaktu SAC ralkap cu nihin February ni 24 ah luhhnawh in kah an ton caah SAC ralkap 3 an thi tiah dohthlennak tuahtu ralkap hruaitu pakhat nih a chim.
February ni 24, zinglei suimilam 11:45AM ah Myanmar Economic bank a hngaktu hna cu luhhnawh le kah an ton caah a thimi ralkap 3 leng ah minung 2 nih hliam an tuar tiah theih a si.
“Atu bantukin kan kahnak ding ah hin ngiatthlainak kan tuah caan a sau cang, Myanmar Economic Bank ah hin caankel tein minung 5 nih an hngah tawn. Zeitik caan ah zeidah an tuah timi ṭha tein ngiatthlainak kan tuah hnu ah atu bantukin kan kah khawh hna hi a si.
Bank hngaktu 5 lakah 3 an thi i 2 nih hliamhma an tuar” tiah tualchung hriamtlai phu hruaitu pakhat nih a chim. Bank hngak SAC ralkap hna cu Chindwin Attack Force le Butalin battalion, tualchung hriamtlai LPDF phufonh nih an kahdoh hna.TCP