Pakhatnak: Ye Peng SAC Ralkap Check Gate Um, Ralkap 15 Nak Tlawm Lo Thah An Tong. Mon ramkulh, Ye peng hlei check gate um ralkap cu Ye Bilu phu nih kan nam hna caah SAC ralkap 15 nak tlawm lo an thi, tiah Ye Bilu hruaitu nih a chim.
February ni 19 zing suimilam 7:15AM ah Ye hlei check gate sakhan cu kan va luhhnawh i kan kah caah SAC ralkap 15 nak tlawm lo an thi, tiah a chim chap.
“An sakhan cu kan luhhnawh i kan nam hna caah SAC ralkap 15 nak tlawm lo an thi. An sakhan cu kan laak ko nain hriamnam le zen-kuan kan la kho lo. Kanmah lei in minung 3 hliamhma an pu ve,” tiah Ye Bilu hruaitu nih cun a chim.
Pahnihnak: Saw Peng Nihnih Chung Kahdohnak ah SAC Ralkap 25 An Thi. Magway ramṭhen, Saw peng Kyaukhtu miakpi ralkap cu rallam an sial i, PDF nih atu le atu bomb an puahhnawh tawn hna caah ralkap 25 an thi i tam ngai hliamhma an pu, tiah theih a si.
February ni 16 zing suimilam 8:53AM ah Kyaukhtu miakpi phu in SAC ralkap 108 cu motor 3 in rallam an sial i, Miaye khua chaklei an phak ah Gangaw Battalion 9 nih bomb lung 45 in an puahhnawh hna caah ralkap 10 hrawng an thi. Cuni zanlei ṭhiamṭhiam ah bomb lung 3 in an puahhnawh chap hna i SAC ralkap 1 a thi, 4 hliamhma an pu, tiah theih a si.
February ni 18 chun suimilam 12:41PM ah rallam a sialmi SAC ralkap 170 hrawng cu Kyaukhtu in motor 2 in an kal i Miaye khua thlanglei an phak ah Gangaw Battalion 9 nih bomb lung 10 in an puahhnawh hna caah SAC ralkap 6 an thi, 4 hliamhma fak ngai an pu, tiah theih a si.
SAC ralkap ruak le aa hliammi hna cu leilawng cung ah an khin hna i an kapli hna lioah PDF nih lamhruang in an kah ṭhan hna caah ralkap 8 an thi chap. Cu hnu ah SAC ralkap pawl cu Kyaukhtu lei ah an lan i, Pansan khua chaklei le Kyaukhtu khua luhnak ah bomb lung 10 a puahhnawh chap hna, tiah theih a si.TCP