Tuluk ram, ramdang he pehtlaihnak lei ah ṭuanvo a latu (Minister Of Foreign Affairs) vuanci Qin Gang cu May ni 2, chun ah Naypyidaw a phan i, SAC ralhrang bawizik Min Aung Hlaing he i tonnak an ngei lai, tiah theih a si.
Tuluk ram khuakhangtu le ramdang he pehtlaihnak lei ah ṭuanvo a latu Qin Gang cu Deer Jet Beijing vanlawng No.B8415 in May ni 2, chun suimilam 1:30 tluk ah Naypyidaw a phan i, aa tinhmi cu SAC ralhrang bawizik Min Aung Hlaing he i ton a si.
Cuhnu ah Naypyidaw khuapi in May ni 3 ah Bagan-Nyaung U phanh hnu in May ni 4 ah Myanmar ram in India ram lei ah tlawn aa tim ṭhan, tiah theih a si.
Vuanci Qin Gang hi Myanmar ram a phanh hlan in Myanmar ram he pehtlaiin United Nations Secretary General (UNSG) rianṭuantu Noeleen Heyzer he May ni 1 ah tonnak an ngei i, uknak laaknak kong ah vawleicung ramkip nih lungtlin pi in an cohlannak ding ah chimphuannak a ngei, tiah Khit Thit nih a langhter.
Tuluk ram hi kadang ram hna nakin innpa a si caah Myanmar ram cu a daimi le a ṭhangchomi ram a sinak lai aa ruahchan pin ah a kuaimi Myanmar ram fonhtonh ṭhannak ding ah zapi ceihhmainak thok ṭhan a herhnak kong zong a chimchap, tiah theih a si. Lungmili Post