Lungrual Cu Teinak. (Pakhat le Pakhat I Zum Hna U Si). Tukum (2023) chungah CDF hi CNA ah an i fonh dih lo ahcun tuhnu kum 5 zongah an i fonh hlei ti lai lo. Kum 2 a luan cang, uknak lakka ahcun ahohmanh timh cia cio a si lo caah mah pengtlang in thawh cio kha theihthiam a si ko.
Asinain atu tiang ah kanmah kal in kan kal peng, mah ti ningte i kan kal peng ahcun kan um hmun cio ah hram kan sih dih te lai. Asilole mifir le damiah ah kan i cang dih te lai. Kanmah le kanmah ral ah kan i ser dih te lai.
Atu ningte i kan kal peng ahcun kan khua le kan ram a rawhmi le a kanghmi lawng hi kan i miak te lai. Zei huaha kan khuh-hliah te lai lo. Kawl ralkap hi kum 2/3 men ah kan tei lai i kan sianginn kai zong kan peh lai, kan duhmi paoh kan tuah țhan lai ti phun in kan i ruah rua. CDF ka huatnak hna cu a si lo, Hakha CDF ah ka naule an tampi ve ko.
Cun, Kawl he kan i komh peng le Union of Burma ah kan um peng ahcun anmah nakin a niam deuh ah kan tla peng ko lai. Milu in an kan tei tuk, zei lei hmanh ah kan tluk kho hna lai lo. Union of Burma aa țhencheu lai a phangmi zong kan hei um rih.
CNF/CNA upa hna nih ram le miphun caah thuk deuh le kau deuh in rian țuannak ah tiah Chinland Club an dirh. 2021 hlan thazaang kan pek hna lomi kha cu hei chia cang ko u si. Atu tiang zongah thazaang pek cu chim lo, kan zum rih hna lo.
A chungah luh i bawmh loin a leng in hehchet tiah kan soi hna. Thingkung ti toih loin a theitlai lawng ei kan i tim. Kan duh paoh in phu kan dirh cio, tangka kan khawl cio. Zoh sawhsawh in a zohtu kan tam tuk fawn!
I zum hna u si, i țhen lo in a chung tu ah luh in remh awk a herhnak kha remh khawh i zuam cio hna u si. Thazaang i pe hna u si, i bawm hna u si. Miphun nih a țhawngmi ralkap hi dohthlennak ca lawng ah kan herh lo, luatnak kan hmuh hnu tu hmanh ah khin kan herh chinchin te lai.
Miphun ralkap a simi CNA hi ralkap milu a tlawm bik 10,000, mah nak tam deuh 15,000 tiang zong ngei ko u si law kan ral kan tei lo hmanh ah kan ram caah BIA tampi kan chim khawh lai. Kan ram a him lai i a țhangcho hrimhrim lai.
Chin miphun kan dihlak a hme bik in a ngan bik tiang pumpak cio kan biapi dih. Bochanmi le mifimthiam tiah timi hna dihlak, miphun ralkap ah anmah pumpak in an i paih cio, an luh tik cio le ral an tuk ve tik lawngah luatnak kan hmu te lai. Salai Cung Lian