India Ram Ah Tlanglawng Pahsualnak A Chuak I Minung 13 An Thih Pinah 50 Hrawng Hliam An Tuar. India ram, Andra Pradesh ramkulh ah khualtlawng mi phortu tlanglawng pahnih an i pahsual ruangah minung 13 nunnak a liam i 50 hrawng hliam an tuar.
Nizan October 29, zan suimilam 7 hrawng ah Andhra Pradesh ramkulh, Vizianagaram district ah tlanglawng pahnih hi an i pah, tiah nawlngeitu hna nih an chim. An i pahnak a ruang an dohhlat tikah tlanglawng lei ṭuanvo hna daithlan a si, tiah nawlngeitu lei nih an chim.
Andhra Pradesh ramkulh cozah nih tlanglawng an i pahnak hmun ah hin mi bawmchantu an thlah colh hna. A thimi chungkhar hna cu India phaisa sing hra (₹1,000,000) kan pek hna lai i hliam faak a pu mi chungkhar hna cu ₹ 250,000 kan pek hna pinah hliam hme a pu mi hna cu ₹ 50,000 kan pek hna lai, tiah ramkulh cozah railway minister nih a thanh.
A liamcia thla ah India ram, Odisha ramkulh ah tlanglawng pahnak a rak chuak cang i, minung 292 nunnak a rak liam. The Chin Post