Titanic Lawng Rawk Zoh Dingin A Kalmi Minung 5 Hna Cu An Nunnak A Liam Cang. Atlantic rilipi tawne ah a ummi Titanic lawng rawk zoh dingin rili chung kalnak Titan lawng in a kalmi minung 5 cu an dihlak tein an nunnak a liam cang, tiah rili US Coast Guard nih June 22 ah an thanh.
Titanic lawng rawk umnak in pe 1,600 tluk aa hlatnak ah rili chung kalnak Titan tilawng a cheubang pelpawi 5 kan hmuh, tiah US ti ralkap ṭuanvo ngeitu Mauger nih a chim.
Ti pressure a fah tuk caah Titan tilawng cu a puak i, zeiruang ah dah hi thil hi a can i zeitik caan ah dah a puah ti cu kan hngal rih lo. Titan tilawng pelpawi hna cu rili chung kawlhawlnak seh, robot ROV nih a hmuh, tiah a chim chap.
Nunnak a liammi hna ruak hi kan hmuh ṭhan hna lai tiin kan chim khawh lo pinah kan fehter ngam lo, tiah Mauger nih cun a chim. Titanic lawng rawk zoh dingin minung 5 phortu Titan tilawng cu June 18 ah aa thawh i suimilam 1:45 a rauh hnu ah pehtlainak a cat, tiah theih a si. The Chin Post