Chin ramkulh, Hakha Timit ah SAC ralkap nih hmun 3 in umhmun an khuar i hmun khat cu Chin ralkap nih April 26 zanlei 4:00 hrawng ah an va kah i an laak khawh tiah theih a si. Cuka hmun i kahdohnak ah CNA ralkap Salai John Smith nih ram le miphun ca ah a nunnak a pek tiah theih a si.
April 26, zan suimilam 8:00 hrawng in kahdohnak a chuak ṭhan i zankhuadei meithal thawng le bomb thawng cu a dai lo, kahdohnak a zual ngaingai. Rungtlang um SAC ralkap zong nih miakpi in kah an bawmh hna, tiah tualchung mi pakhat nih The Chin Post ah a chim.
Zan suimilam 10:00 hrawng in cun i hngilh khawh a si ti lo. Hakha um SAC ralkap nih miakpi in voi zeimawzat kah an bawmh hna pin ah Jet Fighter nih Timit lei ah voili tiang bomb a thlak, tiah theih a si.
SAC ralkap Jet Fighter cu a voi khatnak a ra i bomb a thlak hnu ah a kir ṭhan. Cuticun voili khengte a ra i bomb a thlak. Bomb a thlak thawng nih Hakha khuapi le pawngkam khuate zong a tlerh dih caah i hngilh khawh a si lo, tiah tualchung mi hna sin in theih a si.TCP