Khrihfa Hlabu No. 329 ah kan hmuh khawhmi “Thluahchuahnak Ruahpi A Sur Lai-There Shall Be Showers of Blessings” timi hla hi Daniel W. Whittle nih a rak phan i James McGranahan nih a aw a rak bunh.
Major Daniel W. Whittle cu evangelist a rak si i music leiah thiamhleisang a simi James McGranahan he aa kom ngaimi an rak si. An pahnih hi khual an rak tlawngṭi, thawngṭha an rak chimṭi, kum saupi chung an rainṭuannak ah a hlawh a tling ngaimi an rak si.
Pathian fa kan si bantukin Pathian nih Amah caah thei tampi tlai hna seh ti a kan duhpiak. Cu thei a tlainak ding caah kan lungthin vawlei a hman i, a ṭhat a hau. Dinnak thlaici cu a kho lai i, a ṭhang lai.
Thlaici tuhtu bianabia kha Matthai 13 chung ah kan hmuh khawh. Kan thinlung chung ah hin vawlei phun 4 an um-zawnruahnak a ngei lomi vawlei, a puantemi vawlei, a thurhnawmmi vawlei le vawliei ṭha an si.
Vawlei ṭha cu rian a ṭuan i, thlaici tampi a chuahter. Cu thlaici tampi a chuahtertu cu pumpak le chungkhar in aa thawk. A kan dawtu chuahpi unau, hawikom le pawngkam dawtu vialte cung ah kan i lawm tuk.
Soiselnak le thinhun le inpuanternak tampi kan tuar caan lio ah Pathian “Thluachuahnak Ruahpi A Kan Surpi” tertu dawtu nan dihlak cung ah lunglawmhnak tampi kan ngei. Pathian nih hmailei nan rianṭuannak le nan ṭhutdirnak ah a thluachuahza he lam in hruai chin ko hna seh.