Vawiin Zirtawpni hian Ministry of Home Affairs (MHA) chuan Manipur a hmeichhia pahnih saruaka kawng zawhpui thu buai chu CBI in an chhui zui dawn tih Supreme Court a hriattir a, hemi kaihhnawihah hian Manipur Police in mi 7 an man tawh tih a tar lan a ni. MHA in nimina Supreme Court hnena theh luh tur affidavit an siam Home Secretary Ajay Bhalla in hming a ziah hnan chuan a tar lang.
He affidavit in a tar lan dan chuan he thu buai pawh hi Manipur pawnah ngaihtuah tura tih a ni a, Central Bureau of Investigation (CBI) chu he thu buai chhui chiang turin Manipur sorkar rawn chunga thu tlukna siam anih thu India Today chuan vawiin Zirtawpni hian a ziak a ni.
Hmeichhe pahnih saruaka kawng zawhpui social media-a darh kha Supreme Court chuan a ngai thu tak hle a, July 20, 2023 khan khingtu awm ngai kher lo – suo motu cognisance) in a lo ngaihtuah tawh a. Supreme court chuan kha thil thleng kha “constitutional abuse” lian leh zahthlak tak a nih avangin Central lrh Manipur sorkar te chu an hma lak dan kim chang a indawt te tea hrilh zel turin thu a pe a ni.
He thu buai ngaihtuah tura bench din hi Chief Justice of India, DY Chandrachud kaihhruai a ni a, CJI chuan Court hian hemi chungchang hi a ngai pawimawh hle a, Sorkar-in hma a lak loh chuan Supreme court-in hma an lak tur thu a sawi hial anih kha.
“Pawm zam a, namnul theih chi ziazang a ni ngang lo. Chi leh chi inkara buaina chhuak a hmeichhe taksa chunga hleilenna atana hman leh lantir hi hriatthiam theih a ni lo. Kha video darh kan hmuh khan min nghawng a, min țhawng na tak zet a, constitution bawh chhiatna nasa leh hnaisai lo tak a ni.
Sorkar-in hma a lak loh chuan Supreme Court-in hma a la ang,” tih Chief Justice chuan a sawi anih kha. He thu buai ngaihtuahtu bench ah hian CJI DY Chandrachud, Justices PS Narasimha, Manoj Misra te an awm a ni.
Ministry of Home Affairs-in Supreme Court hnena affidavit a theh luhin a tar lan dan chuan Manipur sorkar hian he thu buai chhui zui tur hian July 26 khan CBI kuta pek a rel a, chu thu chu MHA hian a pawm a, chu chu Secretary of the Department of Personnel and Training hnenah nimin July 27 Ningani khan a hlan chhawng ta a ni.
He affidavit hian a sawi zel dan chuan he thil chhui chian hna hi rang taka zawh theih Central Sorkar chuan a beisei a, Supreme Court chu he thu buai chin fel hun bituk awma ( time bound manner) kalpui a nih theihna tur leh bituk sak turin a ngen bawk a, “chu thu buai sawina tur pawh Manipur pawn lam a ni ang”.
“Thu buai inhlan chhawn theihna leh thu buai state danga khawiah pawh rel leh ngaihtuah tura thu neihna hi he court (Supreme Court ) chauh thu a ni, tiin Central Sorkar chu a khak nghal a, chuvangin Central Sorkar-in Court hnena pawmpui tura ngenna pawmpui tura a rawn thlenah hian kaihhruaina a neih duh chu *he thu buai hi CBI ten charge sheet siam ațanga thla ruk chhunga thu buai hi rel zawh hman tur a ni* ” .
Parliament monsoon session pawh Manipur buaina avang hian ro an rel mumal thei lo a, eptu party lamin Prime Minister Narendra Modi chu Manipur buaina chungchang thu sawi turin an phut a, an in-au buai luih luih reng a. Opposition party lam hian “Manipur is burning, INDIA, INDIA” tiin Sorkar chu an au a, ruling party lam hian “Modi, Modi” tiin an au ve bawk.
HEI VE THUNG HI: Supreme Court hian Manipur state chhung buaina chungchang zawng zawng hi rang takin rel vek se kan lo ti rilru ngei ang. Sou moto cognizance hmanga hmanhmawh taka rel a tum chu hmeichhe pahnih saruaka kawng zawhpui chungchang bik kha a ni. He buainain a ken tel thil tam tak – in leh lo leh Biak In hal te leh a kaihhnawih tam tak erawh chu Indegenous Tribal Leader’s Forum in thu buai an theh luh etc ngaihtuah anih hunah rel a ni ang. Source : Business Today Desk