Demoso Peng Kahdohnak Ah KNDF Nih SAC Ralkap Sakhan 2 Laak! SAC Ralkap 30 Leng An Thi. Karenni ramkulh, Demoso peng kahdohnak ah KNDF nih SAC ralkap sakhan pahnih an laak i, SAC lei in ralkap 30 leng an thih pinah meithal 19 le hriamnam tamlak kan laak, tiah KNDF nih cathanh an chuah.
September 2 zinglei suimilam 5:30 hrawngah Karenni ramkulh Demoso peng, Taesule khua SAC ralkap umhmun khuarnak sakhan le SAC ralkap nih umhmun an khuarnak Puhpa khua sakhan cu Karenni ralkap phufonh nih luhhnawh in an kah hna.
Kahdohnak hi zinglei suimilam 5:30 in a chuak i zinglei suimilam 9:30 tiang, suimilam 4 chung an i kap. Cu kahdohnak ah cun SAC ralkap sahkahkhah 2 kuttang um khahlahyiah 9 in deputy commander le rank sang deuh ralkap nih an kuttang um ralkap hna cu nunnak pek ding in hmai an satter hna i cunglei bawi deuh cu an zaam hna. Kahdohnak chung ah cun SAC ralkap ralbawi hna telh in ralkap 30 leng an thi i, hliamhma tuar mi an tam pinah fuhpanh ding hngal loin a zaam mi zong an um, tiah an chim.
Kahdohnak chung ah tualchung hriamtlai phufonh lei zong in hliamhma tuar zeimawzat an um. SAC ralkap sin in 60mm 2, RPG-7 pakhat le zenkuan telh in hriamngam zeimawzat KNDF nih an laak, tiah theih a si. The Chin Post