Monekoe Um SAC Ralkap Sakhan 3 Le Chinshwehaw Um SAC Ralkap Sakhan Pakhat MNDAA Nih An Laak Chap
Shan ramkulh, chaklei Monekoe hmunram um SAC ralkap sakhan 3 nak tlawm lo cu nihin October 30 zinglei ah kan laak ṭhan, tiah MNDAA in chimphuannak nawlngeitu Li Kyia Win nih a chim.
“Nihin zinglei ah Monekoe hmunram um SAC ralkap sakhan 4 tluk kan laak chap. Nizan October 29 zong ah Chinshwehaw hmunram chaklei kam ah a ummi Shante sakhan zong kan laak khawh i cu sakhan in a zaammi SAC ralkap 12 zong kan tlaih hna” tiah a chim chap.
SAC ralkap cheukhat cu mi sawhsawh thuam hruk buin sakhan chung in an zaam. Cu pinah Lashio-Theinni lam um Theinni hlei zong MNDAA nih bomb in an puahhnawh, tiah theih a si.
Cu pinah TNLA nih nizan October 29 ah Theinni um SAC ralkap sakhan pakhat an laaknak kong an thanh. Theinni peng Maili sakhan an laak lioah SAC ralkap meithal zun 15, kuan tampi le ralkap thilri tampi an laak, tiah theih a si.
SAC ralkap nih nihin October 30 ah Helicopter nih Monekoe, Manyan, Pansai hrawng bomb in a thlakmi muicawl zong MNDAA nih an langhter. The Chin Post