Thailand-Myanmar ramri Tak pengkomh Mesauk khua pawng Mesauk-Uhpan leilawng lam ah motorcycle aa citmi Myanmar rammi pahnih cu meithal zun 2 he Thailand nawlngeitu hna nih an tlaih hna, tiah PDF le Thailand thawngthanhtu hna nih an langhter.
May 1 ah motorcycle aa citmi Myanmar rammi pahnih cu Mesauk palik nih lunghrinhnak an ngeih hna caah an check hna i an tlaih hna, tiah theih a si.
Myanmar rammi mino pahnih hi motorcycle aa cit ṭimi an si i hnulei a ṭhumi pa sin ah meithal zun hnih cu non chiahnak buri chung ah aa sanhmi an hmuh caah an tlaih hna, tiah an langhter.
Tlaih a tongmi hna hi kum 20 le kum 25 tluk an si i, SAC ralkap a dotu Karen hriamtlai he pehtlaihnak a ngeimi an si. An dohthlennak phu min belte cu an langhter lo.
Mesauk ah a ummi Myanmar rammi cheukhat nih tlaih a tongmi mino pahnih hi dohthlennak phu ah aa telmi an si lo. Hriamnam cawk le kuatnak kongkau ah ṭuanvo latu an si, tiah an chim ve.
Tlaih a tongmi mino pahnih nih meithal an cawkmi hi Myanmar ram dohthlennak ca ah an cawkmi a si. AK 47 le MK 12 telh in meithal kuanbawm tampi zong Thailand nawlngeitu nih an tlaih hna.
Mino pahnih a tlai khotu palik hna cu rianṭuantu ṭha sinak laksawng an pek hna i, Thailand-Myanmar ramri thluan vialte hriamtlai an cawlcangh ning kan zohfel zungzal lai, tiah Mesauk palik bawi nih a chim.
Tlaih a tongmi hna pahnih nih an cawkmi meithal hi zun khat ah Thailand Baht sing 7 a si i, phungning lo hriamnam cawknak le phungning lo ramchung luhnak upadi in taza an cuai hna lai, tiah theih a si.TCP