Smart phone design dawh suai thiam le smart phone kong cuanh thiam pakhat nih a Youtube in Elon Musk nih “Pi” phone a chuah lai tiah 2021 ah a rak thanh.
Nihin ah cun Tesla Pi Phone 2023 cu India tehna ah cun order khawh si cang tiah a thanhmi website tehna an um.
Tesla nihcun a phone OS caah Apple ta iOS le Google ta Android a hmang lo. Android cu Samsung nih a hman i iOS cu iPhone nih an hman ve. Pi Phone tu nihcun Tesla OS a hman.
Pi Phone cu iPhone 14 Pro Max a saang bik le Galaxy 22 sang bik nakin a mak deuh. 5G thazaang in a rang taktakmi screen he vawleicung hmunzakip ah internet a ngah khawh lonak um lo.
Ramlak tupi kilken phanh sual i phone line nih a phanh lonak hmun ahkhin, Starlink bak in internet a von pek i line ngah lo ti a ngei lo, ti si.
A battery tiah le adang pawl nakin caan sau a nguh pinah, cikhat te betṭhari tha cu thun khawh colh si fawn. Electric um lo nak hmun ah cun, nika tha solar bak in a thaa cu thun khawh si hoi.
A thluak kong ah ti le, minung khuaruahmi hmanh a theih khawh ti tluk in a cak. Na lung chungin theih na duhmi kha Pi Phone hmai cun, na von ruah i a AI nih na duhmi information cu a von in langhpiak thluahmah khawh colh.
Tesla motor na hman paoh ahcun, na motor zong cu na Pi Phone cun na khalh khawh i na duhnak hmun ah an choipi lai, ti si.
Phone na chawnh pah hna khin Youtube zoh ka duh na ti si le “Youtube i VHS nih “ti cawh lo a timi hla hna kha van ka chuahpiak pah khah!” tiah Laiholh zong in na von chimh lai i VHS hla cu an chuahpiak colh lai, ti si.A mak kho tuk lawlaw.
Sihmanhsehlaw, Pu Tesla cu ka hei phone i bia ka hal tikah, Apple le Google nih an iOS le an Android in ka Twitter an ka phihpiak ahcun, keimah tein platform kai ser ve a hau lai ka timi pei si ko cu” a ka ti.
“Chuah nai tiim cang maw? A chuak zau lai, a chuak cang a titu an tam tuk cang hi?” tiah ka hal i “Kai timh zong si lo. Kai timh lo zong si lo. Apple le Google nih Machiavellian phun in uk le control an kan timh tuk ahcun, an vampang ka baoh dih lai” a ti ko teh.
Elon Musk hi chan thar minung ah cun hmai tli cem si ko. A “pai” phone zong cu chuah duh sehlaw cikhat ah a chuah colh khawh hnga i a rak um cia brand minthang pipi zong a lonh dih hna lai, ti si.
Zeicahtiah cun, a Space X fimthiamnak khi a menmenmi si lo. Cu pinah, minung thluak ai hliammi, a thluak a rawk sualmi tbk tehna khi AI nih zeitindah a thluak kan nunter khawh lai ti kong ah R&D tampi a rak tuah cang i cu zong cu a chuak taktak kho dirhmun khi a rak phan cang fawn.
Battery kong ah a mak bik si pinah, solar battery thiamnak lei ah a sang bik pakhat si fawn.
A kut in ai hummi fimthiamnak le rumnak tuak in US mifim tam tuk lawng si lo, vawlei pumpi mifim tampi nih a “pai” phone kong zong cu biasi an phai.A chuah tu cu a chuah rih lo. Chuah a timh cang timi thawng dik zong cu a um rih lo.Salai C Alexander