Manipur-a kan unauten harsatna namen lo an tawk mek tih hre reng chung chuan mahni in luma thlamuang taka chawhlui kil pawh a inthlahrunawm hial ta mai. An tan tih theih em em nei si lovin awmhmunah thinlung a rum tak meuh meuh.
Mihring inpawisak loh leh inrikrap piah lamah thlamuang taka Pathian fakna Biak In vuak chhiat a ni a, meipui karah Biak In kang mek hmuh phei chuan kan Pathianin ro a rel nghak lek loa phuba lak rum rum duhnain thinlung a tur ut ut a. Kan unaute mangang thlabar leh an thisen luang hian keini hi inpumkhat a, an thlamuanna ni turin min au a ni.
Africa ram leh khawvel hmun hrang hranga Ethnic Cleansing (Chi leh Chi, Hnam leh Hman insuatna) kan ralkhat lo hriat ve thin kha, vawiinah, tunah hian kan unaute chungah thawnthu phuahchawp ang maia rapthlakin a thleng mek si. An inring hman lo, an chungah Tsunami ang maiin a rawn chim huk a ni ber. An tawrhna leh an thlaphanna thuk tak hi keini hian kan ngaihtuah phak thiam lo zawk a ni.
Imphal-a zirlai, dam lo leh hnathawk tangkhang, thlabar taka mahni sahimna zawnga sipai camp leh hmun hrang hranga tawm khawmte thlabar dan turzia leh an chhungte rilru mangan turzia hi ngaihtuah thui ngam pawh a ni lo,Lungngaih mangan, thlaphang leh thin phu dep dep chung hian ni khat chu sawi loh, minute khat pawh a rei dawn lutuk. Heng hmuna kan zo hnathlak unau inbengbel te an khawngaihawm takzet.
An tan hian tawngtai sak leh rilru dam lo taka an dinhmun zawh thin bak tih theih a awm si lo. Kan CM zahawm tak hian an ti ngei turah pawh ngai ila, Prime Minister Office leh Home Minister-ah palai (emissary) tirin Manipur-a kan unaute sahimna tur tun aia tha zawk leh langtlang zawk siam turin in-Camp ve tawp mai se.
A tul angin National Media-ah thudik tarlan anih theih nan Delhi-ah arrangement te siam thei se ka ti tak meuh meuh a ni. Engpawh nise sorkarin a theih ang tawk chu a ti zel rihah ngai ila. Sawi leh sawi hnu keini ang duang tan chuan ta se ti a zeldin thu bak han sawi theih kan nei si lo. Lo sawi ve teh chiam pawh a sawngsawhlawt lo mai thei bawk si.
Zofate kan in unauna hi tawng ka chuan sawi chiam a awlsam khawp mai. Mizorama Politician te hi chuan kan sawi deuh vek a. Sawi a mawi avang leh sawi ve hrim hrim turah kan ngai deuh thup ni te pawn ka hre thin. Rhetoric ringawtin he thu hi a ral ang tih erawh ka hlau thin. Mizoram hi Zofate Jerusalem tia kan inkoh dup dup lai hian, nu leh pa chan kan chang zo tak tak em tihte hi ngaihtuah tham tak a ni.
Ni e, ka sawi ta teuh mai, kan unau ten harsatna an tawh lai hian kan theih ang angin Mizoram mipuite hi a chhawmdawltu nih i tum zel ang u. March, 2020 thlaa Chhassad khuaa kan Kuki unaute in an hal sak chiam tum khan an tana theih dan apianga chet ve kha ka duh ber a. Churachandpur lama kan YMA hruaitute hnenah an mamawh turte ka zawt a.
Kan CM hlui Pu Lal Thanhawla ka va bia a, Kuki unaute harsatna an tawh dan te ka va hrilh a, “Ka pu, kan theih ang tawka puih ka tum a, nang pawn puih i duh ka ring”, ka va ti thawr a. Ani chuan, “Puih ngei a tha e”, a lo ti var a. Churachandpur-a Sub-Hqrs. YMA te kaltlangin, Ration leh an mamawh motor lian trip khat kan zuk thawn ve thei ta a. Khang hun lai pawh khan thahnem ngaih a nat ang hu-in theihna lah a thlem thin si a.
Kan unaute nena kan inngaihsak tawn hi a pawimawh. Phuba latu ni loa thatna hmanga zawm khawmtu nih hi a hlu fo. Engtik niah emaw keini Mizorama awmte hian an tanpuina kan la mamawh mai thei. An tanpui ngai loa kan awm a, Pathian zarah tanpui zawktu kan nih reng theih phei chuan a lawmawm hlei hlei a ni.
Manipur-a kan unaute hian kan puihna an mamawh dawn chauh mai thei. An mahni pui turin Pathian khawngaihna avang a ralmuang tak leh zalen taka awm mek kan nih avang te hian kan rilru lo kau lawk ila. Min mamawh ber laia kan unaute kan phak tawka chhawmdawltu ni turin rilru i hawng lawk ang u.
Pathian chakna ring chungin, Manipur-ah remna leh muanna a awm thuai theih nan nasa takin tawngtai chungin, Pathian venhimna ropui an chan theih nan i dilpui ang u. An tan inpekna sang tak kan neih hun a thleng mek a, an mahni chhawmdawl nan kan thilphal a hun. Hawh u i tang tlang ang u.
Mizorama keini awm ho hian Remna leh Muanna hlut zia (a bik takin thangthar thalai rual te hian) kan hre lo tual tual a. Kei ngei pawh hi ram buai hre phah lo ka ni. Kan hriat ve chinah hi chuan Mizoram hi chu a ralmuang deuh dup mai. Mahse, ram buai hre pha kan nu leh pa, kan pi leh pute erawh chuan Remna leh Muana hlutzia an hre chiang em em thung.
Mizorama remna leh muanna a awm theih nana khatih hunlaia kan Kohhran hruaitute, Tlawmngai pawlte leh Sorkarna fawng chelhtute inpekna ropui zia kha sawi nawn fo tlak a ni. A chhan chu Mizoram hi khawvel in ram ralmuang (Peaceful) tia vawiina a hriat theihna chhan bul tanna kha a ni miau a.