Tanintharyi ramṭhen, Maw tlang lei ah rallam a sialmi SAC ralkap cu lamhlat hmehmi bomb in April 26 ah kan puahhnawh hna caah SAC ralkap 5 nak tlawm lo an thi, hliamhma pumi zong an tam,” tiah Tanintharyi peng PDF in ṭuanvo ngeitu nih a chim.
SAC ralkap hna cu a luancia March 28 lio in Tanintharyi peng Teyphyu khua lei ah rallam an sial i, April 26 zinglei ah Theinhkun khua lei ah an kal caah PDF ṭangṭi phu hna nih an kah hna. SAC ralkap cu hnu an kir ṭhan i, Theinhkun le Chaung Hnapauk khua pawng ah PDF ṭangṭi phu nih bomb in an puahhnawh chap hna, tiah theih a si.
Tualchung mi pakhat nih, “SAC ralkap nih rallam an sial ruang ah Thailand ramri lei kalnak ah a ummi khuami hna cu rallam in an zaam. Ralkap nih khuami an tlaihmi hna cu an thah hna caah khuami vialte an zam dih,” tiah a chim.
Tanintharyi peng Theinhkun, Teyphyu le Chuang Hnapauk khua ah March 28 in April 14 tiang kahdohnak a zual caah SAC ralkap 20 leng an thi, tiah Tanintharyi peng PDF nih cathanh an chuah. Kahdohnak a chuahnak hmun hi PDF nih lam an khamnak Htonekha-Mawtaung chawhlehthalnak lam cung ah a umnak a si.
Mawtaung ramri chawhleh chawrawlnak sakhan cu Thailand le Myanmar nih cawhlehnak ah an hmanmi a si i, kum khat ah dollar sing 10 in 18 tiang chawleh chawhrawlnak an tuahnak hmun a si, tiah theih a si.TCP