Ta’ang National Liberation Army(TNLA) nih vawleicung rithaisii hrawh ni, June 27 ah kyats sing 9,000 leng man rithaisii an khangh, tiah The Irrawaddy nih a ṭial.
2018 in 2023 June thla tiang riathaisii kan tlaihmi a si i cu chungah bing hring cuai 93.7, bing rang 56.645 kg, ritsii tlang 3,414,429 aa tel, tiah TNLA nih an thanh.
Voidang ah cun kum fatinte in kan rak hrawh tawn ko nain 2017 hnu ah TNLA kan hmunram chung ah SAC ralkap telh in RCSS le SSA cawlcanghnak ruangah kan hrawk thiam ti lo. Atu kan khanghmi hi kum 5 chung kan rak tlaihmi rithaisii kan fonh i kan khangh, tiah an langhter.
Cu pinah kum 5 chung rithaisii hmangtu minung 2,546, 2012 kum in 2017 kum tiang rithaisii hmangtu minung 5,100, an dihlak 7,646 zong rithaisii hman kan ngolter khawh hna leng ah an ngandamnak le an nuncan ziaza zong kan zohkhenh hna, tiah an langhter.
TNLA in chimphuannak nawlngeitu Colonel Tar Ai Kyaw nih, vawleicung ah Myanmar ram hi rithaisii a chuah biknak ram ah aa tel ve i cu hmanh ah SAC ralkap nih an ukpenmi hmunram chung ah rithaisii a tam bik, tiah a chim.
TNLA nih a luancia 2012 kum thawk in an cawlcanghnak hnunram ah rithaisii hrawh hram an rak thawk i 2012 in 2017 tiang ah bing rang 58.5kg, bing rang tlang 25kg, bing hring cuai 91.78, ritsii tlang 3,297,923 cu mizapi hmai ah mei in an khangh dih. Bing cinnak acres 4,920 zong an hrawh, tiah The Irrawaddy nih cun an langhter. The Chin Post