Pyigyidagun Peng Sui Dawr Pakhat Mifir Nih Luhhnawh In Kyats Sing 2500 Man Leng An Fir. Mandalay, Pyigyidagun peng Htet Wai Yan sui dawr cu April 28 chun ah mifir nih an luhhnawh caah kyats sing 2500 man leng sui an i kalpi tiah theih a si.
“Meithal puah thawng voi hnih hrawng kan theih hnu ah, thlalang kuai thawng kan theih. Cu hnu ah kan pawngkam ummi Htet Wai Yan sui dawr an luhhnawh kan theih ṭhan. Mifir nih an i kalpimi sui hi kyats sing 2500 man leng a si tiah palik nih an chim thawng kan theih” tiin cu thil a cannak pawngkam ummi pakhat nih a chim.
Meithal aa tlaihmi pa pahnih cu dawr chung ah an lut i dawrhngaktu hna cu meithal puahhnawh in an tlerhkhonh hna hnu ah sui chiahnak thlalang an khuai i sui cu an laak tiah palik phu hna he naihniam in ummi nih an chim.
Mifir nih an laakmi sui hna cu suiṭhi phuntling 18, sui tumbul phuntling 470 hrawng tiin kyats sing 2500 man leng an laak i buri chung ah an khumh hnu ah an tlikpi tiah theih a si.
A luancia April 19, zong ah Pyigyidakhun peng Htait Tan sui dawr cu mifir nih an rak luhhnawh i kyats sing 2700 man leng sui an rak firpiak hna tiah theih a si.TCP