Central Lairam, Lawngtlai, 2023 Vaupi 18: Siaha District Phura khua ah Pi Nang Khaw Cing cu a pasal Pu Paduwong (M.Sanga tiah theihmi) nih a thah tiah zumh a si caah an tlaih. Pi Nang Khaw Cing a ruak in an char lio ahhin a pasal hi a um lo caah VC hna le NGO hna i bawm in suimilaam 24 chung ah an tlaih.
Pi Nang Khaw Cing le a pasal hi nai te ah Myanmar lei in Mizoram ah a rak i thialmi an si. 2023 Vaupi 16 zaan Phura khua ah Pi Nang Khaw Cing, thattu tiah zumhmi a pasal Paduwong cu nizaan 2023 Vaupi 17 zaan suimilaam 10 ah Phura MTP Branch nih an tlaih.
Pi Nang Khaw Cing hi 2023 Vaupi 17 zinglei suimilaam 7 ah Phura khuachung Lo ah a ruak in hmuh a si. Lo hi khuachung a si caah zingka tuan i a thomi khuami nih thlalaawng in an hmuh, Lo ah minung a si tiah an hmuhmi cu a cawlcangh lo caah an va zoh ah cun a rak thi cang.
A ruak an hmuh ahhin a hmai hrawng a duk ngaingai, a hnakruh pahnih a kiak, a mitkam hrawng ah hliam a tuar, a hnar in thi tlawmpal tete in a chuak. Mithattu nih hriamnam a hman zumh a si lo, a thih hnuah a ruak hi Lo ah rawt pah in chiah dawh a si.
A ruang cu a ruak hi taklawng in a um, a khel le a tawk vun sining nih a rawt in rawt mi a dawhter. A pasal zong a zaam colh caah, pasal nih a thah theo lai tiah zumh a si, cucaah Phura MTP Sub Hqrs nih an hnawtnam colh i, a zaam khawhnak ding lam Mararam le Central Lairam lei, East Lairam ramri luhchuahnak vialte theihter dih an si
Khuakip ah tlangvaal duty chiah an si, khuachung a luh ngam zumh a si lo caah hmundang dang in vemhimnak an tuah. Cucaah Vaupi 17 zaan suimilaam 10 hrawng ah Phura MTP duty nih Tòkalò le Palà khua kar Sakana tiva ah an hmuh i an tlaih khawh colh, a zaan ah Phura khua phanhpi a si colh. The Lairam Times