RAM CA AH NUNNAK PETU HNA THLAAN CU. Ramhring dawhtuk mi hmun a laifang ah thlaan cu zapi nih naih tein zoh khawh ding khin an tuah. Thlaan a lu leiah khin meipung pakhat an chiah. Cu meipung cu a kaang hluahmah i sen zekzuk khin aa hliau.
“Hihi zeidah a si?” tiah ka hal hna. “Thi hmanh sehlaw rammi thinlung ah a thi lo, a nung peng, tinak a si, a thih ni in nihin tiang mahhi mei hi a mit lo” tiah an ka chimh. Cucu India ram hruaitu an Pa Mahatma Gandhi thlaan Delhi khua i a um mi a si. A caan cu 2023 August 8 zanlei niher 1:12 a si.
Culecangka in ka thinlung chung ah mei-alh aa hliaucolh ve. Hi Gandhi thlaan kan zoh ni hi a linhtuk lio caan a si. A chinchap ah kutka ah kedan i phoih i chiah ta a si. A linhtuk ca ah kalnak lam an phah mi lungtlaap (cuaipia) kan lamh mi nih a duah in a kan duah ca ah “Sakhi meitil laam” an chim bang a hlawh in kan i hlok. Kan nu le kan pa nih cun “A linhtuk ah a cor a chuang” an ti mi khi a si.
Cu nilin nih cun a ka huttuk ca ah ka chunglei in mei-alh aa hliau mi hi a si ko lai tiah ka ruah. Asinain tha tein ka zoh i mei a hliau mi cu Gandhi thlaan a lucung meipung chung in a si. Asinain ka chunglei in a dang aa hliau mi a um ve.
Cucu “Kan ram ca ah nunnak a petu hna kan pasal, kan nusal tha hna thlaan kha ka mitthlaam ah an hung cuang i cu hna thlaan chung in aa hliau mi meizik” a rak si.
Vawleipi nih nifatin in an rak zoh i upatnak an rak pek mi Gandhi thlaan hram ah ka dir lio caan a si. A ngaingai ti ahcun “American President Obama hmanh nih a thlaan a hong zoh i upatnak a hong pek” tiah an ka chimh.
Kei zong ka lungthlite cun upatnak ka pek awk a si ko. Asinain ka thinlung ah kan ram ca ah nunnak petu kan Ralkap hna tu kha ka thinlung ah an hung cuang. Ka thinlung ah mei-alh bang an hun i hliau i upatnak ka pek hna. Hihi ka lungthli tein ka lung a tha lo, a ruang cu atu ka dirnak hmun hi kan pasal tha hna thlaan si lo in India ram ca ah nunnak petu Gandhi thlaan a si.
Cu vial ah “Ra cang, hitluk linh ah, ziahhme ngang ko cun na dir peng ko!” tiah ka hawipa nih a van ka auh i hman zong tlamtling i thla ti lo in kan chuak.
Lampi thluang thluan motor cung ah cu lawng cu ka ruat; kan ram dothlennak a dih tik ah kan Khualipi Hakha khua pawng a hmun remnak ah hmun kau taktak kan kawl lai i cuka ah cun kan ram dothlennak ah nunnak a petu kan pasal tha vialte hna an ruh kan pumh hna lai i kan chiah dih ve te hna lai.
Cu tik ah atu Delhi ah minthang “India Gate” an ti mi India ram ca ah ram dang i raldohnak ah a thi mi ralkap vialte hna philhlonak lungphun an tuah mi bantuk khin kan tuah ve te lai.
Nihin ah kan ram ca ah nunnak a pe cuahmah mi kan pasaltha vialte hna hi kan thinlung ah mei bantuk in mit lo in kan alhter hna awk an si. Zeicatiah ram le miphun ca ah nunnak a petu hna thlaan cu. (Ram ca ah nunnak a petu kan pasal tha hna upatnak le philhlonak ca ah). Crd: Pa Pui