Magway ramṭhen, Saw peng ah rallam a sialmi SAC ralkap motor cu June 21 ah Saw PDF nih bomb an puahhnawh hna i SAC ralkap a thimi an tam, tiah People’s Spring nih a ṭial.
Pakokku in Kyaukhtu lei a kalmi SAC ralkap 100 hrawng a phortu motor cu June 21 zan ah Saw peng, Angia khua le Tapin khua karah Saw PDF le ṭangṭi phu nih bomb in an puahhnawh i ralkap 15 nak tlawm lo an thi. SAC ralkap pawl cu hmai ah kal ngam loin an taap. Bomb puah ruangah SAC motor 2 zong an rawk. Ṭangṭi phu lei in a thimi le aa hliammi an um lo, tiah theih a si.
SAC ralkap nih June 21 ah Saw peng chung ah hriamngan duh poh in an kah ruangah Ywathar khua ah ralhrial in aa dormi hna le phungki telh in tualchung mi 7 cu hriamngan kuan in hliamhma an pu. Minung 4 cu an hliamhma a faak ngai, tiah theih a si.
Pakokku in a chuakmi SAC ralkap motor run cu Kyaukhtu lei an kal caah Kyaukhtu um miakpi ralkap nih khuate lei ah miakpi an kah. SAC ralkap motor run hna cu Kyaukhtu um SAC ralkap hna ca ah hriamnam le zen-kuan an phorh a si kho men, tiah tualchung mi hna nih an zumh. The Chin Post