Tukum tal cu atanglei THANTAR asen-arang-adum “muici” hi kan Chin miphun ningin kan hmang kho cang hnga maw kan ti lioah cheukhat nih Ne Win cozah tuahpiakmi THANTAR (adum-asen-ahring) theo tar asi hoi.
ICNCC tuahmi CND zong Ne Win thantar thiamthiam, US lei Indianapolis tuahmi CND zong Ne Win rovuih takmi thiam,Newin naule tuahpiakmi cu maw miphun thantar ah hman taktak kan duh ko?
Chin miphun cu dothlennak in miphun a ser cuahmahmi kan si. Cucu Chin Nationbuilding process kan ti. Atu hi ralhrang lawng kan do lo. Miphun sernak zong kan kalpi cuahmah.
Cucaah miphun hmelchunh identity asimi thantar zong hi dothlennak nih a hrinmi asi lai. Cucaah atu Chinram CDFs le pentlang tamdeuh ah atanglei thanthar hi an meithal he an temchih cangmi asi.
A tha bikmi asi lo nan ti men lai. 💯 hnatlakmi asi rih lo, Parliament nih a fehtermi si lo nan ti men lai. Asinain atu adang pakhat nan hmanmi khi teh? Kawl Ralkap cozah nih tuahpiakmi pei asi ko cu. Zeidah tlaihchan awk um hlei?
Atu kan dirpimi cu Chinmi dothlennak thisen chungin a chuakmi asi kan ti khah. Dothlennak in miphun kan ser cuahmah kan ti khah. Chinmi nih kanmah tein kan chuahpimi Miphun Thantar kan neihchun a si.
Adang kan nei hlei lo. Cu hlei a sunglawimi le limhang neimi zeidah um ti A lungtling lomi kan unau an um nan ti maw? Cucu mi tamdeuh maw an si mitlawmdeuh? Asi ah an van chuahpimi Ne Win naule alan cu nan lungtling ve le maw?
Atu lioah “dihlak hnatlaknak” timi a um kho rih lo. Miphun Sern Nationbuilding ah concensus timi dihlak hnatlaknak in kal a um theng ballo.
A tha sawk nain cutheng a hau lo. Cucaah a dikmi kha fek tein dirpi le nam can asi ko. Abik in US lei upa pawl rak i laklawh ti hlah uh. Atanglei Thantar hi raltha tein hmang cang hna usih.