Hlasak zuamnak American Idol telh in Idol zuamnak vialte cu, ka kherhhlai khawh tawk, mizapi vote in winner thim a si. Ai zuammi thong tampi kha judge nih an zohfel hmasa hna i, winner ah ai tlak ko timi top 20 tiang hrawng an thim piak hna.
Cu top 20 lakah winner cu mizapi vote in thim a si, judge nih biachahnak nawl an ngei ti lo. Myanmar Idol zong kha mizapi vote in winner thim a si ve, phaisa in vote pek a si caah a fair lonak zong a um kho. Nain, season 4 tiang cu zapi duh bikmi idol nih winner an ngah ko.
Chin Idol 2017 kha judge 3 nih mark 70% bak an ngei. Online mizapi vote ah Aalian nih vote 1000 deng in a tei ko nain Aalian kha final ah hla bia a palh sual caah tampi mark pek awk a tha ti lo i judge mark ah tlawmte lawng a ngah. Kha lio kha a fair lo tiin a phunzai mi zong an rak tam ngai.
Chin STAR hi zeitindah a fair bik in winner kan thim lai timi fak piin ka ruat. Zuamnak dang mark an pek ning tampi zong ka kherhhlai. Mipi vote zong a herh i thiamsang judge mark zong a herh ve timi hi keimah ruahnak a si.
Top 10 hnu ah cun mizapi pekmi vote 70% lak in judge pathum pekmi mark hi 30% lak si te seh ti hi ka tuak ngai. Zalawng tein i ceih tuah hna u sih, nan ruahnak rak chim cio ve hram u.