SAC Ralkap Nih Pazigyi Khua Vanlawng In An Kah Caah Tualchung Mi Tam Ngai An Nunnak Liam. Sagaing ramṭhen, Kanbalu peng Malay hmunram um Pazigyi khua cu SAC ralkap Mi 35 le Fighter nih nihin April ni 11, ah kahdohnak an tuah caah tualchung mi a thimi le aa hliammi an tam, tiah tualchung mi hna sinin theih a si.
Nihin April ni 11, zing suimilam 7:45 hrawng ah Pazigyi khua cu Tada-u van ralkap sakhan in Fighter in kahdohnak a tuah pin ah Monywa Nah Mah Khah in Mi 35 nih khua velchum cu a kah caah tualchung mi a thimi le aa hliammi an um, tiah Kyunhla-Kanbalu cawlcangtu phu nih an chim.
Pazingyi khua ah mizapi ukhruainak zung hunnak an tuah lioah Jet Fighter nih a kah i cu hnu ah Mi 35 nih a kah chap, tiah theih a si. “Ka theih tawk ah tualchung mi 80 tluk hliamhma an pu i, 30 hrawng an nunnak a liam cang.
Hliamhma fak a pumi zong an tam,” tiah Kanbalu peng mizapi ukhruainak phu he phone in aa chawnbiami Khin U peng mizapi ukhruainak phu in ṭuanvo ngeitu pakhat nih a chim.
Shwebo pengkomh Pah Kah Phah ralkap khat zong nih, “Khin U peng nichuah chaklei Pah Kah Phah zung hunnak an tuah lioah Fighter le Mi 35 nih an kah hna tiin kan theih. Tualchung 100 hrawnghrang an i hliam i, 60 hrawng an nunnak a liam,” tiah a chim ve.
SAC ralkap nih, a luancia April ni 7 le 8, ah Sagaing ramṭhen le Pale peng um PDF sakhan 3 cu vanlawng in kahdohnak an rak tuah caah PDF hriamnam le zen-kuan tam tuk an rak laak pin ah PDF ralkap 7 nak tlawm lo an nunnak a rak liam. Video link zohnak