SAC ralkap nih Martial Law an thanhnak Sagaing ramṭhen, Khin-U peng khua thum cu zarh khat chung ah inn 500 hrawng SAC ralkap nih an khanghpiak hna tiah Khin-U peng thawngthanhtu phu sin in theih a si.
Khin-U peng ah ralkap thazaang 150 leng he rallam sialtu SAC ralkap nih April 19 in 25 tiang zarhkhat chung ah Myotit khua, Tapinkaungtaung khua le Kangyikone khua tiin tualchung mi hna umnak inn cu hramhram in an khanghpiak hna.
Myotit khua ah inn 400 leng, Tapinkaungtaung khua ah inn 25 le Kangyikone khua inn 1 tiin an khanghpiak hna tiah Khin-U peng thawngdthanhtu phu nih an cazin ah an langhter.
Khua kip ah rallam sial in tualchung mi hna umnak inn a khangtu SAC ralkap le tualchung hriamtlai phu kar kahdohnak cu April 19 ah Khin-U peng nitlak thlanglei Myakan khuapawng ah a rak chuak i tualchung hriamtlai phu lei in 5 an nunnak a rak liam pin ah, rallam sialtu ralkap hna nih khuami pa 5 an tlaih chih hna tiah theih a si.
SAC ralkap nih hramhram uknak an laak thawk in Khin-U peng khua 70 ah inn 5000 tluk hrawng an khanghpiak cang hna tiah theih a si.TCP