Chin ramkulh, Hakha peng Bungzung khua lei in a rak kaimi SAC ralkap le Chin ralkap kar kahdohnak a chuak, tiah theih a si. “Bungzung lei in a rak kaimi SAC ralkap 100-200 kar hrawng le Chin ralkap cu Lungcawi khua lonh, Hakha lei kap ah April 23 chun ah an i kap.
SAC ralkap hi Leium khuathar an lonh hnu in khoika lei dah an kal ti hi kan hngal kho ti lo nain April 23 ah Hakha lei panh in an kai hi a si,” tiah tualchung mi pakhat nih The Chin Post ah a chim.
April 23 chun suimilam 12:00 hrawng in SAC ralkap le Chin ralkap cu Lungcawi le Lamtuk kar ah an i kap i, kahdohnak a zual ngaingai. Zanlei suimilam 3:00 tiang hrawng an i kah hnuah kahdohnak a dai, tiah theih a si.
SAC ralkap hi an cawlcangh ning le an umkal ning zoh tikah voidang an cawlcangh ning he aa lo ti lo. Chun ah a langh lonak ah an um hna i zan lawng ah rallam an sial, tiah Chin ralkap he naihniam in a ummi pakhat nih The Chin Post ah a chim.
Cu kahdohnak ah SAC ralkap lei in a thimi le hliamhma pumi zong an tam ngai. A zat tu cu fiang in kan thei kho lo. Chin ralkap tu cu an him dih, tiah a chimchap. SAC ralkap nih, Hakha lei panh in rallam an sial ruang ah Gangaw lamthluan ah a ummi khuami hna cu a himnak hmun ah ralhrial in an zaam hna, tiah theih a si.