Hakha peng, Vantlang khua cu May 2 ah SAC ralkap Fighter nih bomb a thlak caah inn 15 hrawng a rawk, tiah theih a si. Bungzung lei in a rak kaimi SAC ralkap cu Chin ralkap nih an kah hna caah tam ngai an thi.
An meithal le hriamnam cheukhat zong Chin ralkap nih an laakpiak hna i fak ngai in Chin ralkap nih an kah hna caah Fighter nih Vantlang khua ah bomb a thlak hi a si, tiah tualchung mi pakhat nih The Chin Post ah a chim.
Inn 4 hi cu an rawk dih ko nain a dang inn 11 tu cu fak in an rawk lo. Thlalangawng tibantuk a kuaimi an si i a diklak inn 15 a rawk. Khuami zong khuachung ah um ngam ti loin ral an hrial hna, tiah theih a si.
“Bungzung lei in a rak kaimi SAC ralkap le Chin ralkap kar kahdohnak a rak chuah lioah ralkap nih kan kap ti hlah u kan kir cang ko lai tiin an auh chih. Cunglei an bawile hna cu kir ding in an nawl hna nain an duh lo i hmainor chih ding in an bawile nih nawl an pek hna,” tiah tualchung mi pakhat nih a chim.
SAC ralkap hna hi Malsawm, Hrawngvun le Vantlang khua kam hrawng zong ah an nehnang a um lo. Khoika lei ah dah an kal hnga ti zong hngalh a si lo nain an kal dan zoh tikah an kalning a khum ngai cang ko, lam hlat deuh ah kal hna sehlaw a dawh, tiah tualchung mi hna nih an chim.
Cu pin ah SAC ralkap nih Chuncung khua cu May 2 zinglei ah a voithumnak an khangh ṭhan caah a tlawm bik inn 14 a ciam ṭhan, tiah Chuncung khua he naihniam in a ummi hna sin in theih a si.
May 3 ah a voi (4)nak an khangh ṭhan i, inn 5 a ciam ṭhan. SAC Ralkap kut in Chuncung khua hi inn 70 tluk a ciam cang. Chuncung khua um SAC ralkap an Tank cu Chin ralkap nih an hrawhpiak cang hna caah Hakha ah maw an lanh te lai ti cu hngalh a si rih lo, tiah theih a si.TCP