SAC Ralkap Fighter Nih Bungmati Khua Ah Bomb A Thlak, Khuami Tampi Hliam Tuar An Um
SAC Ralkap Fighter Nih Bungmati Khua Ah Bomb A Thlak, Khuami A Tlawm Bik Aa Hliammi Le A Thimi 10 An Phan.
Bago ramṭhen, Htantapin peng Bungmati (ဘုံးမ္မတီး) khua cu SAC ralkap Fighter 2 nih May 2 zanlei ah bomb an thlak ruang ah khuami a tlawm bik aa hliammi le a thimi 10 an phan tiah tualchung mi hna nih an chim.
May 2, ah Htantapin peng Bungmati khua pawng ah KNLA/PDF le SAC ralkap kar kahdohnak a chuak i, zanlei suimilam 6:00 hrawng ah Fighter 2 nih Bungmati khua ah bomb an thlak, tiah theih a si.
“SAC Fighter nih Tayettan, Kyuailan, le Bungmati khua ah bomb a thlak. SAC ralkap sakhan pakhat cu PDF nih an kulh dih caah cuka hmun cu Fighter nih bomb a thlak. Tayettan khua zong a kang i tualchung mi 10 nak tlawm lo hliam tuar le a thimi an si.
Kyuailan khuami 3 zong hliamhma an pu. Tapyingut SAC ralkap nih hriamngan in voi tam ngai kah an bawmh hna,” tiah PDF ṭuanvo ngeitu pakhat nih a chim.
Kahdohnak a zual tuk caah Taungngu van ralkap sakhan in Fighter 2 nih bomb an thlak. SAC ralkap nih tualchung mi hna cu zaam lo ding in an hro hna caah tualchung mi tampi zaam kho loin an um, tiah theih a si.TCP
