Raap vanraltuknak thazaang. zeitindah na tei lai? Kawl raap nih 2021 uknak an laakka in ramtang lut dohthleng phu pawl cu vanraltuknak fighter jet le helicopter deuh hmangin hrawhhral aa rak itiim cia.
Uknak an laakka ah Captain Zay Thu Aung, raltuknak helicopter khaltu pa, cu ai CDM. A luatnak hmun a phanh hnu ah Kawl raap nih cuti vanraltuknak deuh hmang in dohdaltu pawl hrawh ai timhnak kong cu a phuan.
MAH raap phu ahkhin vanralkap milu 15,000 hrawng an um. Vanlawng le helicopter 292 an ngei. Cu chungah, jet fighters 81 le raltuknak helicopter 81 an itel. Adangdang cu thil phurtu, minung phurtu tbk an si ve hna.
Chanthar jet fighters a ngeihmi pawl lakah Sukhoi Su-30 le MIG-29 ṭih an nung bik men lai. Su-30 cu pahnih lawng a ngeih rih (an ordermi a phan dih rih lo, ti si) i MIG-29 belte 31 bakte aa ngeih ve. Cu 31 an ngeihmi chungah 5 cu training tuahnak ah an hman.
MIG-29 cu Karen le Kachin lei phomhnak ah a hman ngai hna.Su-30 pawl cu a langhlatpi khin vawleitang hmun kaupi tiang huap in bom in a kah khawh hna. (Su-30 is a heavy long-range fighter while the MiG-29 is a light short-range fighter)
Jet fighter pakhat bom le zen kahthlah dingin voikhat an von thlah ahkhin a dih dingmi phaisa cu US cun, $ 200,000 in $ 350,000 paoh cu a dih (Miemie Winn Byrd).
Nizan tihni Tlangpi khua a kaptu Fighter kha Su-30 cu si kho men. An dih dingmi phaisa van tuak tikah khin, tlerh sawhsawhnak ah cun si lai lo. Mi thah le mi nawn ding hrimhrim in an von thlah ko hna, ti khawh a si.
Thantlang le Thantlang peng ah jet fighter in a ṭhuat tam cang ko. An itimh ning bantuk bel cun hma an kal kho lo ti awk si. A ping le a pang deuh lawngte an ṭhuat. Lairam cu zumtu hna thlacamnak thawngin a nung Pathian nih a kilven rih ko ti a lang.
Khua a von pau lai i MAH le a raap pawl nihcun vanraltuknak cu aa hngat chinchin telai tiah a zaammi Captain Zay Thu Aung nihcun a chim. Van raltuknak a hman tuk telai caah hriamtlai phu pawl nih a hlankan tein ralrinnak ngeih awk a si, ti zong a chim chih.
Van raltuknak a hman tuk ruangah dohthleng phu nih ṭih tuk awk cu an si leem lo. Iralrin ngai i, marzaang deuh le ihliphlau deuh in ṭhialkaam tak lengmang hna ah cun an bom an zen vialte khi pakpalawng ah an hman dih te lai, tiah a ti.
Cu lawng si loin, ral ituknak ahkhin vanraltuknak cu a bawmtu sawh lawng si i, army pithlurpi taktak tei ahkhin cun, vanraltu phu hna cu amah tein a tluril ve ding men khi si ko, tiah a chim chap.
Miemie Winn Byrd timi Kawlnu, US ralbawi hlun, nihcun, dohthleng phu pawl an tam tukmi khi a poi tuk ah chia lo. A biapimi cu phu khat le phu khat ipehtlaih zungzal khawhnak, a herh ahcun operation tuahṭi khawhnak tehna ngeih khawh biapi ko, a ti.
Kawl raap an sual biknak belte cu mipi inn le lo vanraltuknak in kah le bom thlak an hmanmi khi si. NUG thanh ningah, kan hnu November thla tiangah khan raap nih raltuknak i civil an thahmi 155 an si i 190 renglo hliamhma an tuar cang tiah a ti.
Sagaing, Magwe, Mandalay, Bago, cun Tanintharyi regions le Karen, Kayah, Kachin, Rakhine, Shan, Chin le Mon ramkulh tehna ah vanlawng in voi 268 a kah cang hna. Sagaing ramṭhen chung i van in a kahmi hna tam bik (voi 114).
Kawlram pumpi airstrike a tuahmi voi 268 chungah voi 191 cu mipi (civilian) tinh in a kah hna. Sagaing ah bom voi 97 bakte civilian tinh in a kah hna i dothleng phu a kahmi hna cu voi 17 lawng a si.
Mah bantuk in civilian kah hmang a si tikah, “crime against humanity” chungah a sualnak luhter khawh si ko, tiah an ti. Zeitin dah na tei hna lai? Nuuk le naak pawl nihkhin nuhrin covo phu pawl bantuk rian ikhinh i catlap chuah phun le ihrocer sawh phun lawng si loin, ramkhel rian deuh in cawlcang hna sehlaw cu hmai an nawr khawh deuh men hnga, na ti ko lai dah!
Raltuknak vanlawng in ikilven khawhnak le a kahnak hriampi ngei phu cu, Kawlram ah cun Wah lawng an si. Tuluk nih a pek hna i Kawlram chung i adang hriamtlai phu pawl hrimhrim nan zuarh hna lai lo, tiah bia an kamter hna. Tikah, What would you do as a revolutionist? Theihtlei ceihnuam ah kan dangh hna. Salai C Alexander