Karenni Ah SAC Ralhrang Nih Duhpaoh In Hriamngan An Kah Caah Mipi Thimi Le Hliamtuar An Tam!
Karenni ramkulh, Demoso (ဒီးမော့ဆို) peng le Hpruso(ဖရူဆို) peng hna ah SAC ralhrang nih duhpaoh in an kahmi hriamngan ruang ah tualchung mipi thimi le hliamhma tuarmi an um tiah theih a si.
Nohawng[February] 27 chun ah Bawlakhe (ဘောလခဲ) khuapi hrambunh SAC ralhrang nih kahdohnak umlo nain duhpaoh in hriamngan an kah caah tualchungmi 3 nih hliamhma an tuar i, sii-khan an kalpi lio hna ah kum 70 tluk pa pakhat nunnak a liam, tiah an langhter.
Cubantuk ṭhiam in Nohawng[February] 27, zan suimilam 9:00 tluk ah Demoso kuapi hrambunh SAC ralhrang pawl nih duhpaoh in hriamngan an kah caah ralhrial hna umnak sakhan a tlak i, nu pakhat a nunnak liam, hliamhma tuarmi zong an um, tiah tualchungmi nih an langhter.
Tualchung mipi pakhat nih “Zan suimilam 9:00 tluk ah SAC ralhrang nih duhpaoh in hriamngan an kahmi ruang ah nu pakhat a nunnak liam, hliamhma tuarmi zong an um nain fiang tein kan theikho rih lo” tiah a chim. Crd: Lungmili Post