Palaw Peng Ah Ngakchia 5 Telh In Minung 7 Thah An Tong. Taningtharyi ramṭhen, Palaw peng Nyaungshinkone(ညောင်ရှင်ကုန်း) khua February ni 11 zan ah ngakchia 5 telh in chungkhar khat ah minung 7 thah an tong tiah tualchung mi nih an chim.
SAC ralkap kuttang um khuabawi U Aung Myint inn cu February ni 11, zan suimilam 9:00PM hrawng ah hriamtlai phu pakhat nih luhhnawh in an thah hna tiah an chim.
Thah a tongmi hna cu U Aung Myint nupi Daw Kyin Nway(kum 60), a fanu Daw Tan Tan Maw(kum 40), an tupa Maung Nay Htat Thein(kum 17), Maung Zaeya Aung(kum 16), Maung Soe Paing(kum 13), Ma May Zin Phyu(kum 9) le a naupa kum 2 fai tiin minung 7 thah an tong tiah SAC ṭanhtu telegram channel nih an langhter.
SAC kuttang rianṭuanmi Taningtharyi ramṭhen chimphuannak nawlngeitu vuanci U Yin Htway nih cun hi thil a tuahtu hi PDF an si tiah a puh hna.
“PDF nih khuabawi cu an kawl nain an hmuh lo caah, a chungkhar cu an thah hna, an 7 ning in an thi, khuabawi cu khoika hmun ah a um kan thei lo” tiah a chim.
Palaw peng tualchung hriamtlai phu PPDF nih cun Palaw pengc hung minung 7 thah an tonnak kong ah mizei phu nih an thah hna fiang tein kan thei rih lo tiah an chim.
SAC nih uknak a laak thawk in 2023, January thla tiang Taningtharyi ramṭhen chung ah tualchung mi 360 thah an tong cu chung ah Palaw peng in tualchung mi 42 an i tel tiah Southern Monitor nih an cazin ah an langhter.TCP