Chinshwehaw Khua Cu SAC Ralhrang Nih Hriamngan Le Raltuknak Vanlawng In An Kah Caah Mipi Thimi Le Hliamtuar An Um
Shan ramkulh chaklei Chinshwehaw khuapi mipi ralkap hna nih nizan ah an luhhnawh i an laak khawh caah SAC ralhrang nih thal bomb hna le raltuknak vanlawng hna hmang in an kah caah mipi nunnak liammi le hliamhma tuarmi an um, tiah Chinshwehaw hmunram chung ralhrial mipi hna nih an chim.
October 27 zing ah mipi ralkap hna nih SAC ralhrang sakhan pawl le chek gate hna cu an laak khawh caah SAC ralhrang nih cunglei le hriamngan hna hmang in chunnitlak, zan khuadei in an kah.
Chinshwehaw lei ralzaam camp minung 500 hrawng an umnak hmun zong atu bantuk in an kah lengmang caah mipi nunnak liammi le hliamtuar zong an um i motor lam cung ah thlam pawl i sak in kan i dor hna, a tang phah ding zong zeihmanh kan ngei lo.
Tuluk ram chung ralzaam hna umnak hmun zong ah ralhrang kah mi hriamngan kuan a tla” tiah ralzaam pakhat nih a chim.Mah bantuk ṭhiam in Lashio khua lei zong nizan ah pehtlai in kahdohnak a chuah hnu in tuzing tiang ah meithal le hriamngan puahkeh thawng theih a si, tiah Khit Thit nih a langhter.
Nitlak lei hriamtlai ṭangṭi phu 3 hna fonh simi MNDAA, TNLA, AA hna nih SAC ralhrang an hram chah ding in nawl an chuah hnu ah Shan ramkulh chaklei hmunram chung cu SAC ralhrang nih hriamngan le raltuknak vanlawng hna hmang in kahdohnak an tuah, tiah a langhter chih.Lungmili Post