In Sacrifices For Liberty and Peace: Thlantlang. Nihin cu Thlantlang khualai lamtonpi (laansung) ah ka dir. Hnuhmai kai mer. Minute pakhat dan ah a puak mi meithal thawng dah lo, thawng a dai zirziar. Ning a ti. Caanphiao kang ai thlai i ai khawng mi thawng hna dah lo, a king cikcek.
Dawr lamthluan pi ka zoh. Palik len lam ka hei zoh. Saisihchuak lam ka hei cuan. Market sang leilam ka hei zoh than. Voidang nihin ah khan cun mu, Chin Miphun ni lai sikaw, kan urhsaih le kan timhlamh vialte, dawr lamthluan thawri vialte. Motor Cycle lutchuak le hngerhte chuakchuak minung vialte.
Tiokap khua mi pawl dawr lamtlang ah pawl phingpheng tete in dawrngei pawl he thilman kan i det pah lio tete hna, Paliklen lam ah Aria Sabuti dawr lutchuak seino rual rik le raak hna, Palik len in a hung tum mi mitsen ho kianlo cheukhat le Hakha lei in a rak tlung mi Taungzalat le Chintaungtan bus pawl hna; ka mitthlam ah a tomtom in an run cuang.
Nain, ka mitthlam zong ah a cuang bal lo mi lansung ah ka dir a si. Aih! Nan ngai tuk sual lai. Ka chim duh mi ah van biatak ta ning. Zauk pennak nan duh maw? “Duh!”. Mah te khuakhan lairel nan duh maw? “Duh!”. Nan duh taktak maw? “Duh taktak!”. Zeidah na pek ve kun lai? Lehnak a tam lengluang cio ko lai.
Kan pasaltha hna nunnak thisen, kan innlo vialte le kan sumpai viate hna ruah ah “kan siang lo tuk ko” hna ta. Sihmanhselaw, kan sianlo mi, kan duh lo mi thil hna cu kan miphun le kan ram i a thaizing ca luatnak le daihnak ca ah sianglo taktak in hitihin kan pek ko. Zalennak le daihnak ca ah sianlo bu in pekchanh mi khua. Thantlang a si.
Ka phan bal lo nain Ukraine ram Nuclear power plant puah ruang ah chuahtak mi khua Chernobyl khuapi maw ka lawhter deuh, ISIS ralhrang nih an hrawh mi Syria ram Aleppo khuapi dah ka ti. Thi rim a nam. Thlaan rim a nam.
A min a hlam ko khi bang. A mawh lo. Ramtha hrin ai thawknak khua a si i, a min zong Thlantlang a si bang; nu nih nau a ngeih lio i thlantlang i a um bang, a thlantlang. A hriangbik khuapi. Luatnak nau hrinnak ding khua a si. Dawt mi miphunhawi hna; Kan biak mi kan Pathian nih teinak a kan pek i, kan ral cu kan nawr cuahmah.
Kan ral cu thlantlang i a parte ahkhin ai chang sawhsawh cang. Chuaklak in kan en khawh nakhnga kan thiamnak thil lian he thil hme he hehmaw tiah kan chuah cio than hna lai i, Thlankhur ah kan thlak khawh hrimhrim kolai. Salai Tial Hram Ling