Salai Htet Ni: CNDF DS nih Tibual camp SAC ralkap cu Mizoram tiang a thlah hna. Falam peng Tibual Camp ah a um mi SAC ralkap hna cu CNDF DS nih Mizoram ah a zaam ter hna i amah nih a va thlah hna tiah theih a si.
November 15 zing arkhuang ah Tibual camp cu CNDF nih an va luh hnawh hna i an camp zong tlamtling tein an lak i an khangh piak dih hna tiah CNDF media a si mi The Rihli Voice nih a ttial. Kahdohnak ah SAC ralkap 2 an thi, a dang pawl cu an zaam dih, hriamnam tor le cheng an lak khawh tiah a langhter chap. Hi kong he pehtlaiin CNF/CNA biaphuangtu Salai Htet Ni nih cun Tio le Rih kan lak hnu ah
Tibual kan nam tthan lai kan ti nain an rak theih caah November 14, zaan suimilam 9 ah an hriamnam he an rak chuak dih cang. A poi bik mi cu CNDF DS pa nih Saikhumphai tiang a va thlak hna, Asinain Ralhrang nih Camp an chuahtak ahcun mipi zong an him i kanmah lei zong kan him ti mi lungput he kan i hnem tthan tiah Vanrawng Zuunthil biaruahnak a chim.
“Tibual Camp SAC ralkap pawl cu camp nan chuahtak lo ahcun nan thi dih lai tiah ralrinnak kan pek hmasa hna i, i ruahnak caan kan pek hmasa hna. Camp kap ding in kan va kal tikah an rak um ti lo.
Mizoram lei ah an rak zaam dih cang. Mizoram ah CNDF DS ni a hruai hna timi cu a dik lo mi a si, kan naule pawl a hruai hnanak ah khualtlungkal nih an hmuh i SAC ralkap lamhruaitu ah an puhnak hi a si tiah CNO/CNDF vice President nih The Chin Post ah a chim.
Tibual SAC ralkap pawl hi Mizoram Palik, Assam Rifles, VC le YMA nih cun an rak zaam lai timi hi an theih diam cang, cucaah Ni khat le zaan khat an rakhngah cang hna, cu hnu ceo ah an i tong kho hna i Assam Rifles le Palik sin ah an hriamnam he an i pe dih tiah theih a si.