Laiza Pawng Ralzaam Riahbuk Ah Bomb A Tlak I Minung 30 Deng An Thih Kong Ah SAC Ralhraang An I Pheh.Kachin Independent Army/Kachin Independent Organization, hmunpi a umnak Laiza pawng Kachin ralzaam riahbuk ah hriamngan a tla i, a puahnak kong ah Burma ralhraang nih an i pheh.
Laiza he meng 2 hrawng aa hlatnak Mung Lai Hkyet ralzaam riahbuk cu zahan suimilaam 11 hrawng ah hriamngan a tlak caah nu le ngakchia telh in minung 29 an nunnak a liam tiah nihin October 10 zinglei ah KIO/KIA nih an chim.
SAC ralhraang in chimnak nawlngeitu Col. Zaw Min Thun nih ” Ramri ah remdaihnak a um khawhnakhnga kan tuanmi a um, hi bantuk kan tuah lio ah kahdohnak tuah kan i tim lo. online chung a kaimi hmanthlak zoh tikah vanlawng in bomb thlakmi a si lo
Anmah lei nih hi hmun hrawng ah hmunhma an laak i, nichiar ti awk in kan riahbuk ah drone bomb an rak thlak. KIA chungah hriam puahkhehnak a rak chuak bal, cu ah cun hriamnam tampi an sunghmi a um ” tiah i pheh in bia a chim.
KIO in biachimnak nawlngeitu Col. Naw Bu nih ” An kah lo a si lo, an hriamngan in an kah, ankah mi kong ah i pheh awk a si lo. Mung Lai Hkyet hi Burma ralhraang nih an kah. Tu bantuk i an kahnak hriamngan pawl hi tlangcungmi hriamtlai nih kan ngei lo” tiah Burma ralhraang biachimmi lehnak a tuah colh ve. CBN Daily News