SAC ralkap nih Myanmar ram uknak an laak ni February 1, 2021 thawk in February 1, 2024 tiang, kum 3 chung ah Chin miphun chung in minung 600 leng an nunnak a liam, tiah Institute of Chin Affairs (ICA) nih February 1 ah report a chuah.
Dohthlennak kum 3 caan chung ah SAC ralkap nih Chin miphun cung ah nuhrin covo an buarnak a tuah mi report chung ah ICA nih atu bantuk in a langhter hi a si.
Chinram chung lawnglawng ah hin kum 3 chung ah SAC ralkap kut in Chinmi minung 445 an nunnak a liam tiah ICA nih a langhter.
Chinram leng, Sagaing, Magwe, Yangon, Mandalay le a dang Myanmar ramchung hmun hna ah a um mi Chinmi minung 173 zong SAC ralkap kut in an nunnak a liam, tiah a langhter chap.
Chinram chung le Chinram leng ah SAC ralkap kut in a nunnak a liam mi Chinmi zapi ah minung 618 an si. Hi 618 chung ah hin sualnak ngei lo rammi sawhsawh le SAC ralkap a dotu Chin miphun ralkap zong an i tel hna.
Cun, SAC ralkap le Chin miphun ralkap hna karlak kahdohnak ruang ah innlo chuahtak in ral a zaam mi Chin miphun milu 80,000 hrawng an um, tiah ICA reprot nih a langhter. The Hakha Post