SAC Ralhrang Inn Khangh Nak Ruangah Kum 70 Upa Minung Pathum An Nunnak A Liam
Monywa Peng Ah Ralhrang Nih Inn An Khangh: Kum 70 Upa Minung 3 An Thi. Sagaing ramthen, Monywa (မုံရွာ)peng Tha-naung- Kung (ထနောင်းကုန်း) khua cu SAC ralhrang nih March 15 ah inn an khangh biak hna caah kum 70 tluk upa minung 3 an thi i khua mi 500 tluk ral an zam tiah kan theih.
Ralhrang nih khua mi inn an khangh piak mi hna ah minung 3 an thi i inn 35 a kang. Thianh hlimhnak kan tuah lio a si caah thilsining fiang chim khawh a si rih lo, tar minung pathum a thi mi hna hi nu pa khat le pa pahnih an si, an zam khawh lo caah a tu bantuk in mei nih a kangh chih hna hi a si tiah khua mi nih an chim.
Ralhrang hna cu khua chung an luh hnu ah khua mi minung 20 auh in bia an hal hna hnu ah a tu bantuk in inn an khangh hi a si. Inn an khangh khawh an kir lei ah khua mi an tlaih mi hna cu an thlah than hna.
Ralhrang pawl cu Sa-lin-kyi khua lei ah phu hnih ah then in an kal than caah khua kiangkap um mi khua 8 an zam hna tiah tualchung mi nih an chim.
March 15 ah ramkhel ruangah thongtla bawmtu phu AAPP nih uknak lak hnu in tuni tiangah ralhrang kut in minung 3,130 an thi i Biak inn telh in inn 55,000 an khangh cang tiah a langhter. Lungmili Post
