Kalaymyo Hmunlai Baptist Biakinn Pawng Bomb Puah Ruangah Ngakchia Pakhat Nunnak A Liam! Sagaing ramṭhen, Kalaymyo Hmunlai Baptist Biakinn pawng ah nizaan September 28, zaanlei suimilam 5:30 hrawng ah khan bomb puahkehnak a chuak i kum 10 tluk ngakchia pakhat nunnak a liam, tiah tualchung mi nih RFA ah an chim.
Joseph Tluang Than Vel(kum 10) cu September 28, zaanlei ah a hawile he bicycle an i cit lio, Hmunlai Baptist Biakinn pawng an phanh ah bomb a puak i, a paw le a ṭaang ah hliamhma faak pu. Siizung an kalpi lio ah a nunnak a liam, tiah nunnak liammi he naihniam in ummi hna nih an chim.
“Bomb puah kong ah zei bantuk phu nih an hmanh mi a si hngalh a si rih lo,” tiah Hmunlai sang ummi pakhat nih a chim. Tualchung mipi zong nih kan umkal le leng kan chuah tikah ralring tein umkal kan herh ko, tiah Hmunlai sangchung ummi nu pakhat nih a chim. The Chin Post