(KNDF: A Nightmare for SAC). Karenni (Kaya) ramkulh chung i SAC a dohtu hna lak ah thazang a ṭhawng i a ngan bik a si mi cu Karenni Nationalities Defense Force (KNDF) an si.
Karenni ramkulh ah Loikaw, Demoso, Hpruso, Shadow, Bawlakhe, Hpasawng le Mese tiin peng 7 a um i milu sing 3 hrawng an um. A bit-kauh cu mengkulh 11,731.5 a si i Myanmar i ramkulh 7 lak ah a hmebik a si nain SAC dohnak ah lung aa rual bik le a ṭhawng bik an si.
Karnni ramkulh cu SAC ralbawi hna zung an ṭhutnak Naypyidaw he aa naih caah caan tawite chungah minung le hriamnam thazang in a ṭhawng ngai mi KNDF cu Naypyidaw i SAC ralbawi hna caah zan mang chia a hung si.KNDF Thawhkehnak
KNDF cu ralhrang uknak dohdaltu kawmiṭi (Kaya ramkulh) in aa thawk mi a si. Ralhrang uknak doh lo langhter in lam a zawh mi mizapi kha SAC ralhrang nih hriamnam hmangin an ṭhencheu hna hnuah lamzawhnak kawmiṭi nih cun hriamtlaih in dohnak lam kha aa thim. Cuticun an ngeihchun hriamnam he 2021, March thla zarhkhatnak in raldoh cawnnak an tuah.
Cun April 9, 2021 ah Karenni State Consultative Council (KSCC) an dirh. KSCC ah hin EAOs, 2020 thimnak ah teinak a hmutu hna, ramkhel paṭi hna, zatlangbu hna, mino le nu bu hna le cathiamsang hna an i tel. KSCC a rian cu Karenni ramkulh uknak ser, upadi ser, biaceihnak le uknak kong ah ruahnak pek, National Unity Consuktative Council (NUCC) le NUG he pehtlaihnak tuah hna an si.
Kum 2021, March zarhkhatnak ah battalion pali in Karenni State Army (KSA) cu an dirh i Demoso peng Kyauksekan khua kahdohnak ah a voikhatnak meithal an puah ve. Asinain kha lioah KSA min hi an langhter rih lo.
Tlawmpal ah Karenni ramkulh chungah KSA bantukin SAC ralhrang dohtu bu thar an chuak len. Cutikah kahdohnak ah khaukhan lairel le ukhruai an har. Cucaah KSA telh in hriamtlaibu dihlak i ton in KSCC nih theihpinak tang ah KNDF cu lungrual tein May 31, 2021 ah an dirh.
KNDF ralkap hna hriamnam in a bawm i raldoh a cawnpiaktu bik cu Karenni Army (KA) an si. KA cu Karenni National Progressive Party (KNPP) i a ralkapbu a si. Ramkhel Pomning (နိုင်ငံရေးခံယူချက်)
KNDF nih atu i Karenni ramkulh laawng si loin Shan ramkulh thlanglei Mobae, Phekhone, Ponglawng, Pinmana nichuahlei hmunhma le Leihtu Myo chaklei hmunhma tiang a huap tiah an pom. Cu Karenni hmunhma hna cu kan komh ṭhan lai tiah an chim.
Cun Myanmar ram Federal kong he pehtlai in mahle ramkulh le hmunhma cio ah mahte khuakhan lairel khawhnak le i uk khawhnak nawl a ngei i ramkomh le ramkulh karlak ah nawlngeihnak i ṭhenphawtnak a um mi Federal ramkomh ser dingin an pom fawn.
Cu Federal ramkomh ser nakding ah Panglong hnatlaknak, Marneplaw hnatlaknak, 1961 Taungkyi Conference hnatlaknak le Federal Constitution Drafting and Coordinating Committee (FCDCC) ah aa tel mi phunghram hna kha KNDF nih an cohlan.
Federal ramkomh ser nakding ah National Unity Consultative Council (NUCC), NUG le CRPH he a herhning in kan i bawm lai tiah KNDF Chairman Khun Bi Htoo nih KNDF kum 2 tlin lawmhnak, May 31, 2023 ah a chim.
Khuapau dohthlennak a dih hnuah Federal ramkomh phunghrampi ningin Karen ramkulh i ramkulh ralkap sinak in miphun caah kan dir lai tiah KNDF nih cun an thanh. June 6, 2023 ah Karenni Interim Executive Council (KIEC) an dirh i mipi kilvennak, palikbu, thonginn le zatlang khuasak tintuknak rian kha ṭha tein kan kalpi lai tiah an thanh.
KNDF hi kum 2 lawng a si rih nain Karenni ramkulh ah cun thazang a ṭhawngbik le raldoh a thiambik an si. KNDF raldoh a chimtu, a dirkamhtu a si mi Karenni Army (KA) hi ralkap 3,000 hrawng an si lio ah KNDF cu Military Strategy (Sit-byu-ha) 6 le battalion 22 an um i ralkap thazang 7,000 renglo an si.
Hriamnam lei ah KA, KNU, AA, MNDAA le TNLA nih an kan bawmh tiah KNDF nih an thanh. Kum 2 chung ah KNDF le SAC ralkap kahdohnak voi 1,000 leng a chuak i SAC ralkap 1,065 an thi. KNDF lei in 153 nih an nunnak an pek. Mi sawhsawh a thi mi 152 an si tiah KNDF kum 2 tlinnak ah Chairman Khun Bi Htoo nih cun a chim.
Khuapau dohthlennak ah Karenni ramkulh hi a tuarbik an si i ralhrial zong a tam bik an si. Asinain SAC dohnak ah a ṭhawngbik le a hlawhtlingbik an si ve. I cawn awk a tlak tuk mi pakhat cu KNDF hi a tambik le a ṭhawngbik an si ko nain anmah a rak bawmtu le raldoh a rak chimtu KA kha an upat i an ṭihzah mi hi a si.
KNDF kum 2 tlinnak, May 31, 2023 ah Chairman Khun Bi Htoo nih “KNDF cu KA hruainak le lamhmuhsaknak tangah kan kal peng lai” tiah a chim. By. Salai CP Lian