Ralzaam A Phurtu Motor Pakhat Aa Let I Minung Pahnih An Thi, Ngakchia 5 Telh In Motor Aa Cit Mi Hliam An Tuar Dih. Chinram, Tedim peng, Lamzang khua pawng ah ralzaam a phurtu motor pakhat cu aa let i a hmun ah minung pahnih nunnak a liam pinah ngakchia 5 telh in motor aa cit mi vialte hliam an tuar dih, tiah tualchung mi nih an chim.
Nihin March 6, zanlei suimilam 3:00 hrawng ah Kalaymyo in India-Myanmar ramri Rihkhawdar khuapi ah ralzaam in a kal mi tualchung mi a phurtu motor pakhat cu Tedim khuapi lonh, Lamzaang khua pawng lam thlang ah a liam, tiah tualchung mi pakhat nih a chim.
“Motor cu rang ngaiin a ra i seh lei ciankuan lo ruang zong a si kho men, cuti cun kan khua UPC Biakinn thlang ah a liam, a liamnak hmun hi pe 20-30 kar hrawng a si lai,” tiah mithmutu tualchung mi pakhat nih a chim.
Motor khawndennak in pa pakhat le nu pakhat cu a hmun ah an nunnak a liam i, nunnak a liam mi hna konglam theih an si lo nain Lamzang mino ZYA nih an ruak an fimtawl hna. Cu pin ah ngakchia 5 telh in hliam a tuar mi vialte cu Tedim khuapi siizungpi ah a rannak in an kalpi hna, tiah theih a si.
“Aa hliam mi cu an dihlak in lungfim lo in an um i kum 10 tang ngakchia 5 zong an i tel, a tam-u cu an lu an i hliam i a zualhma deuh mi cu ZYA motor, tualchung mi motor le Tedim khuapi in STBA motor 3 he Tedim siizungpi ah an kalpi hna,” tiah pumpak in hliamtuar mi pawl a bawmtu nu pakhat nih a chim.
Atu hrawng cu Kalaymyo le a kiangkap ah SAC ralkap le tualchung hriamtlai phu kar kahdohnak a fak i nifatin ti tluk in kahdohnak a um caah khuapi chung ah um ngam ti lo in khuate lei le Rihkhawdar lei ah ral an zaam hna, tiah theih a si.The Chin Post