May 2 ah CNA tatmaha 5 area ah ralhrang langta, Jet nih bom a thlakmi ah, Malsawm khua Biakinn chak thlacamnak tlangkam ah bom a thlak i, Inn lo rawkral a um lo, bom ci nih inn hriang deuh thlalangawng a hei peh kuai deuh pawl a si.
A bik in ralhrang le kan ralkap kahnaknak hmun ramtoi deuhah bom a thlak tiah kan theih. Ralhrang langta bom in kan ralkap pahnih hliam an tuar nain lungretheih awk a si lo tiah kan theih chap.
Vantlang khua hi ka pehtlai kho hna lo nain hmundang um Vantlang lei chimnak ahcun, ralhrang langta bom nih Inn 3 cu a hrawh ko nain a kaangh cu kaang lo tiah an sin in kan theih. An i kahdohnak tucu kan update rih lo, operation kal lio si caah theih awk ttha vial ka hun thanh.
Thawngpang dang relchap- Thla Khat Chung Ah SAC Ralkap Nih Mindat Ah Vanlawng In Kahdohnak Voi 19 A Tuah
2023, April thla khat chung ah SAC ralkap nih Mindat peng chung ah vanlawng in kahdohnak voi 19 a tuah ruang ah kum 4 ngakchia pakhat telh in sualnak ngei lo tualchung mi 3 an nunnak a liam, 9 nih hliamhma fak an tuar tiah CDF-Mindat nih May 1 ah cathanh a chuah.
SAC ralkap nih vanlawng hmang in dohnak a tuah ruang ah le hriamngan an hman ruang ah tualchung mi hna umnak inn 11, biakinn 2 le sianginn 1 tiin inn 14 a rawk, April 25 ah SAC ralkap nih tualchung mi 3 an tlaih hna tiah an thanhmi ah cun an langhter chih.
Cu pin ah SAC ralkap le Chin hriamtlai CDF-Mindat kar April thla chung ah kahdohnak voi 5 a cang. Cu kahdohnak chung ah SAC ralkap hna cu CDF-Kanpetlet, The Youth Force(Saw, Kyaukhtu) phufonh nih an bawmh hna.
April thla khat chung ah kaphnih kar i kahdohnak voi 5 a cang, cu kahdohnak chung ah cun SAC ralkap 20 leng an thi. CDF-Mindat in ralkap pakhat nih hliamhma a tuar tiah Chin Defence Force – Mindat nih May 1 ah cathanh a chuah.TCP