Pekhon Peng Rahrial Umnak Cu SAC Ralkap Nih Bomb An Thlak Caah Tualchung Mi 3 Hliamhma An Pu !!
Shan ramkulh thlanglei Pekhon peng ralhrial umnak hmun cu SAC ralkap nih, April 25 zanlei suimilam 1:00 ah bomb an thlak caah Saunghpwe khua siikhan a rawk, tiah KNDF nih cathanh an chuah.
Tualchung mi cung ah SAC ralkap nih vanlawng hmang in kahdohnak an tuahmi hi tanglei kahdohnak ah tam ngai an thi cang i, hliamhma tampi pumi an um ruang ah a si, tiah tualchung mi pakhat nih a chim.
SAC ralkap nih a ruang um loin Saungpwe khua ah Jet Fighter in bomb an thlak caah tualchung mi pathum hliamhma an pu i, pakhat hi a hliamhma a fak ngaingai. Siikhan 2, sii-ai zeimawzat, motorcycle le leilawng cheukhat zong an rawk.
Saunghpwe khua um sii-khan ah khuami hna le ralhrial an um hna i an ngandamnak zohkhenhnak ah an hmanmi hmun a si, tiah theih a si.
A luancia April 23, zanlei zong ah Bawlakhe peng Hawkhan khua pawng ah kahdohnak zeihmanh um loin Fighter pakhat nih bomb lung 2 a rak thlak caah inn pakhat a rawk, tiah theih a si.
Cu pin ah April 23 ni ṭhiamṭhiam ah Shan- Karenni ramri Pekhon peng Myosalone khua kahdohnak ah SAC ralkap 20 nak tlawm lo an thi i, hriamnam le zen-kuan tampi zong kan laak, tiah KNDF nih an langhter.