SAC ralkap a sawm le a zaa in an thih tik ah kan tha a nuam tluk khin mipi ralkap pakhat a nunnak a liam ti thawngpang kan theih tik ah kan ui hna ning le kan lungfah khi cuaithlaiṭi ahcun kan lungfahnak khing a rit deuh cio lai tiah ka zumh.
Dohthlennak caan chung ah kahdohnak cu a um phung a si. Kahdohnak a um cang ah cun thihnak nih a zulh chih tawn. Hi thihnak ah hin kan ralkap hna a si khawhchung in an nun a himnak ding caah le an dohmi ral an tei khawhnak ding caah cun atu lio ah “Drone” hi a herh bik le a biapi bik a si ko rua tiah ka ruah ve.
Kan ral dohnak caah “Drone” hi tam deuh in i hmang kho sehlaw, nun himnak he ral tuknak hmun in a rak kir ding mi kan ralkap hna khi kan mitthlam ah cuanter hna usih law thawhbur kong zong ah kan tha a tho deuh lai dah. Drone tampi an hman khawh a si ahcun, kee ralkap zong an tha a dam deuh pin ah nunnak zong a himter deuh lai, kan ralkap nun paamnak hi tampi a zorter deuh fawn lai.
Nai tan ah kan hmuh ciomi CNA/CDF “Drone” team nih Tank an hrawhnak le SAC ralkap an thihnak thawngpang nih kan lung a kan hmuihter cio lai tiah ka ruah. Atu hnu pin lei ah SAC ralkap an hran ning a zual chin lengmang lai
Kaphnih i kahdohnak ah thazaang a thlau tukmi he i kahdoh tik ah nunnak, thisen tampi a luan ti lo nakding caah kan mipi ralkap nih an herhmi “Drone” hi peng/tlang cio in siseh a bu in siseh thazaang chuah in bawmhchanhnak um kho sehlaw ral tuknak caah tampi hlawhtlinnak a kan pek lai pin ah kan ralkap nun zong a himter tuk hnga.
Kan Chin ralkap an fim thiamnak a sanning, an ṭhawnning le an i zuamning, an lungsauning hi an rianṭuannak in tampi hmuh khawh a si. Kan ralkap hna hi soisel lo in upat hna usih, daw hna usih, thazaang pe hna usih, ram dawtnak he ram caah rian a ṭuantu hna hi kan upat hrimhrim hna awk an si.
Ral tuknak caah kan herhmi “Drone” tampi a chuah khawh nakding caah mipi ṭangrual in thazaang chuahchin ko hna usih, Pathian nih a kan umpi lai i teinak kan hmuh ko lai. By. Anna Par