Tonzaang Peng Motor Canghsualnak Ruangah Minung 7 Nunnak Liam!Chin ramkulh, Tonzaang peng, Shialthawzaang khua in Singgialzaang khua lei ah ruak humh ding in a kalmi motor pakhat cu an kir lei ah ruahlo piin canghsualnak a ton ruangah motor chung cuang mi 7 nunnak a liam, tiah tualchung mi nih an chim.
June 24, chun suimilam 12:00 hrawng ah Singgialzaang khua in Shialthawngzaang khua lei i a kirmi Pu Mang Khen motor cu thing in tuahmi Yesakyo hleidonh an tan lio ah hleidonh mih a kiahpi hna i cu motor cu hlei tang ah aa tla, tiah theih a si.
“Singgialzaang khua ah mithi an um caah chungkhat sahlawh hna nih ruak humh ding in an zulhmi motor cu hleidonh an zawh lio ah hlei cu ruahlo piin a tla i motor chung cuang mi 7 nunnak a liam. Minung 2 hliamhma an tuar i hliamhma tuar mi hna cu Yazagyo sii-inn ah an thlop hna” tiah Singgialzaang khuami hna he naihniam in um mi nih an chim.
Motor canghsualnak ruangah nunnak a liam mi hna cu nihin June, 25 chun suimilam 12:00 ah Khrihfa phunglam in ruak vuinak an tuah, tiah theih a si. Motor a tlaknak thing hleidonh cu a ropcak tuk mi a si cang, tiah cuka lam a zawh tawn mi hna nih an chim.
Singgialzaang khua cu Yazagyo in meng thum hrawng a hlatnak ah a ummi a si i, Kalaymyo in meng 20 aa hlatnak ah aa ummi khua a si.Hmanthlak : Tedim Times. Crd:TCP