Congress party atanga a ban chungchangah Pu KS Thanga hian a tih phak tawk leh a tihawm tawk a ti niin kan hria a. Congress party-ah dinhmun tha a chan lai pawhin Congress party mi mai ni lo, Mizoram mipuiin a mizia chiang taka kan hriat a ni a.
Chuvangin, Parliamentary Secretary leh Minister dinhmun hiala hlang kaitu Congress party a chhuahsan tak beih let nana a thuziakte pawh a mizia enin a tihawm tawkah Congress party chuan kan ngai a. He thil avang hian kan party mipuite tumah chiai lo turin kan ngen che u a ni.
June 9, 2023 a Pu KS Thanga banna lehkhaah khan thu diklo leh puhna dik lo (allegation) tam tak a awm a. Khang thu diklo leh puhna dik lo te kha kan President zahawm tak tihhminghliau tumna a nih bakah, mawi lo taka Congress party beihna a nih avangin a tul dan angin defamation case pawh kan la ngaihtuah ang.
Pathian hnenah Congress party hian Mizoram tan sorkar tha kan dil thin a. Sorkar tha kan dinna turah kan tana hnawk te pawh min thensak turin Pathian hruaina kan dil thin bawk a. Tunah hian kan tih ni miah loin ‘That Loh Theih Lohna Bawm’ a awm thei lo chu anmahni an insenghawi tan niin kan hria a, Pathian hnenah lawmthu kan sawi a ni.
Congress party hmalam hunah hian eng anga harsatna pawh la awm dawn mahse Pathian chakna ringin kan President zahawm tak Pu Lalsawta hoin kan su tlang zel dawn a. Ram leh hnam rawngbawl kan tum danah hian kan chian em avangin Sorkar Tha din kan tumna kawngah Mizoram mipuite thlawpna kan ngen nghal bawk a ni.
Kan President Pu Lalsawta’n Pathian rawn chung zela Congress party a kaihhruai dan hi tha kan tiin kan ring tawk a. Mizoram tana a hmathlir hi kan ram leh hnam tana tha, hmasawnna thlen thei tur leh dinchhuahpui theihna tur niah kan ngai a; Sorkar Tha siam tura Pu Lalsawta kaihhruaina hnuaia lungrual taka theihtawp chhuah zel kan tum a, kan zui zel dawn a ni.