Revival (Ṭhangh phawknak). Khrih zumtu hna kan caah a sunglawi cemmi ThiangThlarau rianṭuannak (revival) kong ah kan thinlung a hung acawl caang cio. Asung lawi tuk ee. USA ah hin ṭhanghphawknak (revival) ThiangThlarau rianṭuan cawlcanghnak hi 17th in 21th kumzabu tiang Bawipa nih a rak um ter lengmang mi hmuh khawh asi. Cu hna lak ah a ropui cem ah ruahmi cu:
1). April 14, 1906, 312 Azusa street, Los Angeles, CA ah a rak i thokmi revival arak si. Ai thok ning cu Pastor William J . Seymour hi rawlulh in ni 10 chung thla acam hnu ah ThiangThlarau nih a chungah rian aṭuan i holhtheihlo in a holh . Hi thawngpang cu mipi nih an theih tik ah Seymour sin ah cun Khrih zumtu hna cu Thlacam ah an rak chuak thluahmah i Inn nih a tlum ti hna lo i, Hall ngan deuh an rak hlan i cu inn ah cun an i ṭhial i ni 35 hrawng thla an rak cam ti asi.
Hi revival ah hin holh theih lo (speaking in tongues) in an rak holh ti asi. Hi ThiangThlarau ṭhangh phawknak nih cun Africa ram le Europe ram tiang arak cul. Azusa revival i ai telmi micheu khat cu Pathian ThiangThlarau nih an nun a tongh hna caah Africa ram le vawlei cung khua za kip ah missionary rian ṭuan ah an i thawh i Bawipa thawngṭha bia cu zumlo tu hna sin ah nunnak pek in an rak phuan.
2). Atu Asbury college campus revival hi February 3, 1970 ah a rak i thok ve i college SiangInn campuses 130 tiang a rak lawn. ThiangTharau rianṭuannak (revival) ai thoknak hmun cu chapel timi college sianghnakchia pawl Pathian an biaknak inn ah asi. Atu February 8, 2023 in tu chun February 17, 2023 tiang zong cu hi chapel in ai thok ṭhiamṭhiam.
Ruah dingah sawmnak: Ṭhanghphawknak (revival) cu Pathian ThiangThlarau he i ton hnu lawngah a chuak mi mei alh asi. Cu meialh nih cun kan minung hlun ruahnak le zumhnak kha a kangh i ruahnak thar le zumhnak thar a kan phurh. Cu revival cu Bible relnak, thlacamnak, le Pathian thangṭhat nak hmun lawnglawng in ai sem mi mei ci asi.
Khrih zumtu hawile hna kan mah pumpak nih revival conak dingah zei dah kan tuah ve awk asi hnga? ThiangThlarau nih fiannak kan pe cio ko seh. Amen. Khrih ah nan hawi, David Za Thuan. Gopsel Ministry International