Cancer zawtnak ruang ah Lila timi nu cu vawleicung a nunnak a dih deng cang. An pa Timote nih “Dawtu Pathian” nih zei ruang ahdah kan nu cung ah cancer zawtnak nih a tlunter hnga tiah khua a ruat.
Lila nih a chan chung ah midang sinah Pathian thawngṭha a rak chimh hna I an thlarau ṭhanchonak caah thlaici tampi a rak tuh. Sihmanhsehlaw, “Ka Pa, zei ruang ahdah hi thil hi ka cung ah na tlunter?” tiah Pathian sinah biahalnak a rak tuah.
Timote nih hmuh khawh lomi Pathian nih a umpi, a zohkhenh, lam a hruainak hna cu a nun lamthluan hmuhtonnak hna thawng in a theih. “Ka biakmi ka Pathian nih Amah lamthluan, aa timh ning in lam a ka hruai ko” ti cu ka hngalh. “Bawipa nih a mi cu a thuhtak cang hna, sihmanhsehlaw kei nih cun ka zumh I kaa bochan” (Isaiah 8:17).
Lungrethei, sifah, ngaihchiat le harnak phunkip kan ton caan, bawmtu ngei loin kan um caan ah “Pathian hi a um taktak hnga maw?” timi biahalnak kan ngei tawn kho men? A luancia caan kan nun lamthluan ah Pathian nih a rak tuahmi thil kha ruat ṭhan u sih.
Hmuh khawh lomi Pathian nih kan nun lamthluan ah “Hmuh khawhmi” khuaruahhar thil tampi a tuah. Pathian nih kan nunnak ah a caan a phanh tikah Amah aa timh ning tein khuaruahhar thil a tuah, a biakam zeitik hmanh ah a let bal lo. “Kaa tinhmi cu ka tlolh bal lai lo, tuah kaa timhmi cu a dihlak in ka tuah lai” (Isaiah 46:9).
Pathian nih cun biakamnak a tuahmi kha zumhawktlak tein a zulh I a tuahmi thil paoh kha an ṭha dih (Salm 145:13b). Kan nun lamthluan ah kan tonmi harnak, ngaihchiatnak, lungretheihnak vialte kan hngalh khawh lo caan ah “Khuaruahhar Fimchimtu, A ṭhawngmi Pathian, A biakam a let bal lomi Pathian” bochan I zuam hna u sih. Beechy Thang